Chief Minister in Vigilance Awareness Week pualin thuchah a sawi
Chief Minister Pu Lalduhoma chuan Mizoram chu Lakshadweep dawta eirukna tlem berna state a nih thu leh hei hi thil chhinchhiah tlak leh chhuanawm tak a nih thu a sawi.Vawiin Thawhtanni atanga Pathianni thlenga hman tur Vigilance Week, 2025 puala a thuchahah he thu hi sawiin Chief Minister chuan Vigilance Week chu kumtin Sardar Vallabhbhai Patel-a piancham, October ni 31 huamchhunga hman thin ani ati a, hrui khat vuana eirukna leh hlemhletna do tura mipuite zirtir na’na hman thin a nih thu sawiin,Mizoram sorkar Vigilance department pawhin kum 2018 atangin kumtin he hapta hi a hmang thin thu a sawi a. Chief Minister chuan eirukna chu hmasawnna daltu, mipuiten an chanvo dik an chan theihlohna bul, Pathian huat zawng a nih thu a sawi a. Mahni chhungkua theuhah eirukna do hna huai taka kalpui tur leh eirukna sum atanga lei thil reng reng duh lo ngam turin mipuite a ngen a ni.
Pu Lalduhoma chuan eirukna laka fihlim theihna turin sorkar laipuiin Prevention of Corruption Act, 1988 a siam thu leh sorkar hnathawkte chu CSS Conduct Rules, 1964 danin a phuar thu a sawi a. Prevention of Corruption Act, 1988 hnuai-ah Anti Corruption Bureau (ACB) leh Mizoram Lokayukta din a ni tawh tih sawiin kumin chhungin eirukna leh a kaihhnawih thilah ACB chu preliminary inquiry tih phalna 10 pek a nih tawh thu leh regular case siam phalna 5 pek an nih tawh thu a sawi a.
Transparency International in Corruption hluar lam tehna Corruption Perception Index, 2024 ah India chu ram 180 zingah 96 na a, a dah thu leh kum 2023 aiin pathumin hma a sawn thu a sawi a. Transparency International leh NITI Aayog data behchhana CMS India Corruption Study in a hmuhchhuah danin Mizoram chu Lakshadweep dawta eirukna tlem berna state a nih thu leh thil chhinchhiah tlak leh chhuanawm tak a nih thu a sawi bawk.
