CHIEF MINISTER-IN SERCHHIPAH ADDITIONAL DISTRICT & SESSIONS JUDGE CIRCUIT COURT HAWNG
Vawiin khan Chief Minister Pu Lalduhoma chuan a bial Serchhip District Court-ah Additional District & Sessions Judge Circuit Court a hawng. Circuit Court hi thubuai lian zawk ngaihtuah thei Addl. District & Sessions Judge, Serchhip-a a khat tawka a thut theihna tur hmun a ni.Chief Minister chuan, he Circuit Court hi Court sang zawk chhawp hnaihna (Accessible), rang zawka Court rorelna (Efficiency) kalpuina leh thubuai hmanhmawhthlak bik tana insawrbingna (Specialised Justice) tangkai tak a ni a. A bik takin NDPS case leh POCSO case tan a tangkai hle ang.Kan hriat theuh angin kan ramah Drugs a hluar a, ruihhlo ngai an pung zel a, thubuai ngaihtuah tur pung ve zelin case pawh a lian tual tual emaw tih theih a ni. Serchhip district phei chu ram lailia awm, a ruka sumdawngten an paltlan nasat a ni a, kan Police leh Excise te pawhin an man nasa thin. POCSO case pawh kan ngah viau bawk a, heng case ngaihtuah theihna Court sang zawk mamawhna hi a sang tual tual a ni, a ti.
November ni 25, 2024 khan Circuit Court dinna tur hi sorkar chuan Notification a tichhuak a, Additional District & Sessions Judge II, Aizawl chu Serchhip hmui tura tih a ni. Hun engnge maw chen an han tichhin a, staff lam tlakchham vang te, Court room mumal tak a la awm loh avangtein chawlhsan leh rih a. Kumin June thla atang khan Video Conferencing in kalpui a ni leh ta a. Ti hian Courtroom mumal tak an nei zui ta a ni.
Separation of Judiciary hi Mizoramah kum 2006 khan puan a ni a, Serchhip District Court hi kum 2009 ah kalpui tan a ni. Judicial Magistrate First Class in a ṭhut chilh phawt a. Court Building hran a la awm loh vangin DC Office-a room pakhat chu luah thin a ni. Kum 2014- ah Chief Judicial Magistrate dah ṭan a ni a. DC Office atang chuan kum 2016 ah District Court Building, PE Vengah hian an insawn ta a. CJM hi District chhunga pawikhawihna thleng, kum 7 thleng hremna chin ngaithuah theihna Court a ni a. Civil Case pawh khawih theih a ni nain case lian tham Session case kan tih ho, murder case te, ruihhlo kaihhnawih ND&PS Case te, pawngsual case te, POCSO te leh Bail lamah Anticipatory Bail te chu khawih theih a ni thin lo va. Hetia Additional District & Session Judge Circuit Court hawn a nih takah chuan Session Case te pawh ngaihtuah theih a ni dawn ta a ni. Additional District & Sessions Judge II, Aizawl chuan Serchhip hi a hmui dawn a, tuna he mawhphurhna chelh mektu chu Pi Julie Lalrinzami a ni.Circuit Court hawnnaah hian Justice Marli Vankung, Judge Gauhati High Court chu khualzahawm a ni a. Pi Helen Dawngliani, District & Sessions Judge, Aizawl, Pu Thanglianmang Guite, Secy, L& J, Pu Paul L. Khuma, DC Serchhip, Pu Gavit Gogna, SP Serchhip, bakah Law & Judicial, Court officials leh BAR member pawimawh tak takte an tel a ni.
