CHIEF MINISTER-IN H&B WATER PARK HAWNG
Vawiin khan Chief Minister Pu Lalduhoma chuan Pu R. Tlanghmingthangate chhungkaw enkawl H&B Water Park, Liando Resorts, Sakawrtuichhun a mi chu a hawng.A hawnna thu a sawinaah Chief Minister chuan, India Hmarchhaka Water lian ber dawttu ni phak khawpa lian leh tha Hminga & Bawli Water Park hawn a ni thei ta chu lawmawm a tih thu a sawi a. State dangah chauh awm tura kan ngaih deuh thin, mi tam takin kan tu leh fate tlawhpui kan chak em em Water Park changtlung tak Mizoramin kan nei ve ta a ni. Chhungkaw thenkhat phei chuan an tu leh fate state dang Water Park-ah te an hruai hial a. Tunah chuan keimahni state chhungah ngei pan manhla tak a lo awm ta a ni.
Ramin hma a sawn zel a, mipuiten hna kan thawk nasa tial tial a, kan hunawl neih chhunte nuam taka hman kan duh ni a tam tial tial. Chutiang kan mamawh nia pan nahawm tak niin ka hria a, tlawhtu pawh an tam chho hlein ka ring. Pu R. Tlanghmingthangate chhungkuain hetiang hmun buatsaih nachang an hria hi an bengvar ka ti a, an chungah lawmthu ka sawi a, an kal zelna turah duhsakna ka hlan a ni, a ti.
Pu R. Liansangkima chuan technical report a pe a, “Kum 10 vel kaltaah Kolkata Nicco Park a WET n Wild khu kan tlawh a, Mizoram a awm ve atan kan it em em a, a hnu kum 5 velah tih ve theih dan a awm ang em tiin ngaihtuahna kan seng tan ta a ni. Ka nu leh pate bulah rawtnate kan thlen a, a ram hi ka pa’n tunhmaa a lo neih sa avangin loan lain bul kan tan ve rawih mai a ni, a ti. Mizoram mipui tana din a ni a, mipuiten hahdam nan, intihhlim nan rawn hmang se ka duh a, kan sawm a ni, a ti bawk. Park hi tlawh theiha an peihna rei tawh mahse mumal taka hawn a la ni lo va. Vawiin hian an hawng ta a ni.
