Chief minister-in defence minister kawm
Pu Laduhoma, Chief Minister chuan vawiin khan Rajnath Singh, Defence Minister chu New Delhi-ah a hmu a, thil pawimawh tak tak an sawidun. Chief Minister chuan, Mizo Territorial Army Battalion din a nih theihna kawnga hma a lakpuina avangin lawmthu a hrilh a. He Battalion hi June 2025 atanga bultan tur a nih thu leh Mizo thalaite tana hna siamtu pawimawh tak a nih tur thu a hrilh.
Strategic Highways chungchang pawh sawi lan niin, Chief Minister hian Mizorama kan kawngpuite tha zawka kan enkawl theihna turin Mizoram chhunga National Highway leh State Highway te chu Strategic Highways a puansak turin Defence Minister hnenah hian a thlen a ni. Defence Minister hian Mizorama Private school te chu Sainik School te nen Public Private Partnership (PPP) model-a thawhdun theih a nih thu a lo sawi a, private school te chuan online a application an thehluh a ngaih thu leh, private school thlanchhuah te hi Sainik School anga pawm theih an nih thu Chief Minister hnenah hian a lo sawi a ni.
Chief Minister hi MP Pu Richard Vanlalhmangaiha, Pu Vanlaldina Fanai, Commissioner & Secretary to Chief Minister leh Pi R. Lalrodingi, OSD to Chief Minister ten an tawiawm a ni.
