Chief minister hovin mizoram security coordination commitee te thukhawm
Vawiin khan Mizoram sawrkarin ramri kaltlanga dan bawhchhiatna venna kawnga chak zawka hnathawktuten hma an lakho theihna tura a din, Mizoram Security Coordination Committee te chu an chairman Pu Lalduhoma, Chief Minister hovin an thukhawm a. Hei hi an vawi khat thutkhawmna a ni. Meetingah hian Indo- Myanmar ramri dinhmun te, Indo – Bangladesh ramri dinhmun te, Mizoram leh a thenawm state ramri dinhmun te, ramri paltlanga ruihhlo leh ralthuam tawlhruk chungchang te leh hmalak zel dan tur thil pawimawh te an sawi a. Tripura leh Mizoram ramri, New Kawnpui vela Tripura State Rifles ten temporary check post leh sentry shed an rawn siam te chu Chief Secretary leh DGP level-a inbiak a nih hnuah Tripura Rifles hian an hmunhma te tichhiaa an kalsan thu tarlan a ni.
Mizoram sualna record tam ber chu rukruk case a ni mek a, kum tling lo pawngsual (POCSO Act) bawhchhiatna pawh a tam hle nia tarlan a ni. ND& PS Act hnuaiah case 338 nikum 2024 chhung khan registered a ni a, kuminah hian May thla thlengin case 114 ziah luh a ni. Methphetamine tablet hi kumin chhungin May thla thleng khan kg 648.824 man a ni tawh a, Rs. 84 Cr. man vel nia chhut a ni. Crystal Meth hi Kg 5.169 an man tawh bawk a, Rs. 15.5 Cr man vel nia chhut a ni. Nikum 2024 chhung khan ralthuam leh puak thei case 47 ziah luh a ni a, mi 56 man an ni a. Kuminah May thla thleng khan case 34 register tawh niin mi 51 man tawh an ni.
Heng bakah hian ILP chungchang te, One Nation One Ration Card anga Manipur atanga himna zawnga rawn insawn ten ration card an neih ve vekna tur te, international tourist (khualzin) Mizoram rawn tlawh duh ten permit rang zawk a an neih theih dan tur te pawh an sawi. He meetingah hian Home Minister Pu K. Sapdanga, Excise & Narcotics Minister Pu Lalnghinglova Hmar, Chief Secretary Pu Khilli Ram Meena, Pu Anil Shukla, DGP bakah Mizoram chhunga sawrkar laipui leh state hnuaia venhimna lam thawktu hrang hranga thuneitu sang te chu member an ni a. An meeting hmasa berah hian an kal tha hle a ni.
