Chief Electoral Officer, Mizoram in Election Commission of India hotute a kawm
Vawiin khan Dr. Lalrozama, Chief Electoral Officer, Mizoram thar chuan Pu Madhup Vyas, Chief Electoral Officer, Mizoram kal chhuak ta leh tuna Election Commission of India-a Deputy Election Commissioner hna chelh mektu leh Election Commission of India a mi pawimawh dangte New Delhi-ah a kawm. Chief Electoral Officer hi Pi Ethel Rothangpuii, Joint Chief Electoral Officer-in a tawiawm a ni. Dr. Lalrozama, Chief Electoral Officer, Mizoram chuan Mizorama Election Department in harsatna a neihte leh hmasawn ngaihna laite Election Commission of India hotute hnenah hian a thlen a. Chung zingah chuan district hrang hranga inthlanna hmanrua Electronic Voting Machine (EVM) dahthatna Warehouse thawm that a ngaih thu sawiin, Election Commission of India duh dan anga heng Warehouse himna atan venghimtu tarn zawk dah belh tura Police Department ngen an nih thu a sawi bawk.
Election Department-a thawktu indaihlohna su kiang tura hmachhawpte a sawipui bakah Election Department-in building hran a neih loh avanga harsatna a tawhte thlenin, building hrang neih loh hian inthlan laiin venhimna thlenga nghawng a neih avangin a rang lama building hrang neih a tul thu a sawi. Hemi bakah hian Mizoram chhungah media kan la neih chantlun tawk loh avangin Election Commission of India hmalakna hrang hrang puanzarna kawngah harsatna a awm thin thu a sawi bawk. Election Commission of India hotute chuan Mizoram chhung inthlanah Mizoram People’s Forum (MPF) ten inthlanna thianghlim a awm theih nana an hmalaknate tha an tih thu sawiin. Mizoram chu State ralmuang a nih anga state dangte entawntlak khawpa in thlanna felfai neih a nih thin avangin Mizo mipuite chungah lawmthu an sawi bawk.
Election Commission of India chu “one nation one election” kalpui turin a inbuatsaih mup mup thu sawiin. Chief Electoral Officer leh Election Department hnuaia thawktu zawng zawngte he hmalakna a hlawhtlin theih nan theih tawpa tan lakpui turin an sawm a ni.He meeting-ah hian Parliament Secretariat-a hotute pawh lo telin kumin chhunga Rajya Sabha inthlan lo awm tur thlir lawk a ni a, inthlanna fel fai a awm theih nan thawhpui turin Chief Electoral Officer leh Electin Department-a a thawhpuite an sawm a ni.
