Champhai college zirlaite kaziranga national park & tiger reserve tlawh tur vailiam
Vawiin khan Nature Learning Centre(NLC)-Mizoram chuan Mizoram chhunga College hrang hrang paruk(6) atang thlan chhuah zirlai te leh official mi 45 te chu Nature tour nei turin Chief Wildlife Warden Office kawt,Khatla atangin a tir chhuak. He Nature tour atan hian College thlanchhuah paruk (6)- Govt Champhai College, Govt Serchhip College, Zirtiri Residential Science College, Pachhunga University College, Govt Aizawl College leh J. Thankima College atangte thlan an ni a. Kar khat chhung (Ni 2-6.02.2026 ) Nature Tour hi neih tur niin, Kaziranga National Park, Guwahati Zoo, Ramsar site-Deepor Beel, Vulture Breeding Centre, Pygmy Hog Breeding Centre leh Conservation Centre pawimawh dangte an tlawh dawn a ni.
He Nature Tour Flag off programme hi Pu Laltlanhlua Zathang, Conservator of Forests, Central Circle chuan hmanpuiin zirlaite fuihna thu a sawi a. Kaziranga National Park chu India ram mai nilo, khawvel pumah pawh wildlife Park lar tak a nih thu leh, he Nature tour atanga a tam thei ang ber wildlife conservation chungchangah thiamna rawn hawn turin a chah a ni. Pu Lalbiakchama Chawngthu, DFO Champhai leh Member Secretary- Nature Learning Centre Advisory Board ni bawk chuan Nature Learning Centre kalphung bakah, he Centre hnuaia hlawhtlinna hrang hrang an lo neih tawhte tarlangin, NLC hnuaia hmachhawpte a tarlang bawk.
Nature Learning Centre-Mizoram hi kum 3 chhung project niin Champhai Forest Division hnuaiah kalpui mek a ni a. National Action Plan on Climate Change (NAPCC) hnuaia mission pariat zinga pakhat-National Mission on Himalayan Studies (NMHS) atangin fund hi hmuh a ni.
