Champhai Bawrhsapin State Level Science, Mathematics & Environment Exhibition vawi 43-na kharna hun a hmanpui
SCERT Mizoram buatsaih ni hnih awh State Level Science, Mathematics & Environment Exhibition vawi 43-na kharna hun chu vawiin khan Govt. Champhai High School-ah hman a ni a. He hun hi Champhai Bawrhsap Pu Mohammad Aaquib chuan khuallian niin a hmanpui a, Pi Caroline Zoramthangi, Director, SCERT chu khualzahawm a ni.
Champhai Bawrhsap chuan zirlaite chu tum mumal nei turin a chah a, a bik takin pawl 10 zirlaite chu an result-in an kawng zawh tur thui taka a hril dawn avangin ṭhahnem ngai zual turin a chah a ni. Science Exhibition a zirlaite project chuan amahah phurna nasa tak a pe tih sawiin, ngaihtuahna thar chuan buaina awm mek te chinfel dan tur a pe thei a ni, a ti a. Zirlaite chu chik taka thil ngaihtuahtu ni zel tur leh Champhai leh Mizoramin harsatna a neih hrang hrang te ching fel a, ngaihtuahna thar hmanga ruahmanna ṭha zawk neitu ni zel turin a fuih bawk a ni.
Champhai Bawrhsap chuan Science Exhibition a tel zawng zawng te chu chhuanawm a tih thu sawiin, an zavaiin thil thar hriat belh duhna leh chik zawka thil ngaihtuahna thinlung nen an awmna hmun ṭheuhah hma lo zel turin a chah a. Pu Mohammad Aaquib chuan Champhai District-a zirlai ten Virtual Reality, Augmented Reality leh Artificial Intelligence te an hriatfiah theih nan Experiential Learning Centre Exposure Tour May ni 16 khian neih a ni dawn tih tarlangin, he huna tel ṭheuh turin zirlaite a sawm bawk a ni.
He hun hi Pi K. Lalsiamliani, District Education Officer (DEO) chuan a kaihruai a. Pu Lalliansanga, Deputy Director, SCERT; Dr. Ngainunsiami, Asst Professor, Govt. Champhai College leh Dr Rishikesh Kumar, Asst Professor, NCERT ten thu an sawi bawk a ni.
