Champhai-ah Grape upa tawh tuai thar lehna beihpui thlak a ni dawn
Mission for Integrated Development of Horticulture (MIDH) Special Intervention 2025-2026 hnuaiah Champhai District-a Grape kung upa tawh tuai thar lehna Horticulture Secretary Pi Maria CT Zuali hovin B. Remmawia Packing Hall, Champhai Winery Tlangsamah khuhhawnna neih a ni a, Champhai District Horticulture Officer Pi Lalrinchhani’n hun a kaihruai a, ADHO Pi Lalrinmawii’n Power Point Presentation hmangin Technical Report a pe a ni.Horticulture Secretary Pi Maria CT Zuali chuan Champhai District-ah MIDH Special Intervention 2025-2026 hmanga Grape chin khuhhawnna neih a ni chu lawmawm a tih thu a sawi a, Grape chingtuten an Grape chinah an rilru zawng zawng pea rinawmna leh taimakna nen thahnem ngai taka thawk turin a chah a, hmalam hun thlira chhuan lo la awm zel turte tan an chhawr theih tur khawpa rotling nei turin a fuih. Sorkarin Grape tuai thar leh nan tanpuina a pek te chu tangkai taka hmanga an Grape chinah inpumpekna nen thawka hlawk taka thar turin duhsakna a hlan a ni. Horticulture Secretary hian MIDH hnuaia hamthatna hrang hrang a sem bawk a ni.
He hunah hian Horticulture Director Pu C.H Lalmuanpuia’n thu a sawi bawk a, MIDH Special Intervention 2025-2026 hnuaia Grape thar thawhlehna tur programme tih hlawhtlina a awm chu lawmawm hle a, Sorkarin kuthathawtute a ngaipawimawh a, Grape chingtuten an thawh rah awmze nei zawka an hralh chhuah theih dan tur a ngaihtuah mek zel tih a sawi a, wine rules tha tak hun rei lo tea hman theih a ni tur thu a sawi a ni.
MIDH Special Intervention 2025-2026 hmang hian Grape upa tawh tuai thar lehna turin Horticulture Department chuan Grape chingtute hnenah leitha (Neem Cake) kg 75, leichi (NPK 20:20:20) kg 30, Staking Cord (Grape zamna) roll khat, rannung thahna (Imidacloprid) 200 ml, a natna enkawlna damdawi (Blue Bordo) Kg 4, a kahna (Battery Operated Sprayer) leh a tang tanna (Secateur) cheng singkhat sangli zasarih sawmsarih (₹14,770 ) man hu Grape chingtu mi 360 hnenah unit khat theuh a thlawnin an pe a ni. Champhaiah hian Grape chingtu mi 277 awmin Hnahlanah mi 83 an awm a ni.
