CAG in Mizoram sawrkar din EIBTC a sawisel
Comptroller and Auditor General of India (CAG) chuan an report thar berah Mizoram sorkarin cheng vaibelchhe 4 leh nuai 39 senga Aizawl Zuangtui Venga Export Import Business Training Centre (EIBTC) a din chungchang chu na takin a sawisel a,CAG chuan EIBTC chu heti zat pawisa seng tawh si a, kum 10 liam hnu pawha hna thawh zawh a la ni lo chu thil fel lo tak a ni, a ti. He hmasawnna hna atan hian Ministry of Commerce & Industry ruahmanna hnuai-ah Chief Secretary kaihhruai State Level Export Promotion Committee (SLEPC) chuan kum 2010 khan project an siam a.
He hmunpui din tur hi mahni kutkawiha eizawng leh zirlaite’n thil siam lakluh leh thawn chhuah an zirna hmun tur atana ruahman a ni a, thil zawrh leh hralh dan phung leh zawrh tur thilte changkang zawnga ruahman a, Mizoram dinhmun chawikan chu a tum ber a ni. He tih lai hian sum hman dan endiktute chuan thil felhlel lian tham tak tak an hmuchhuak a ni. CAG Report-in a tarlan danin Export Promotional Industrial Park Authority (EPIPA) project director chuan kum 2021 June thla khan General Financial Rules 2005 rule 150-na bawhchhia-in tender chhuah lovin architectural consultant a ruat a.
A hnu ni 2 chhung leka an consultant ruat chuan cheng vaibelchhe 6 leh nuai 25 senna tur ruahmanna (concept note) a siam peih a, hetah hian consultancy fee cheng nuai 30 a tel a. A hna zawh hun tur engmah bithliah a awm lo ani. EIBTC din hna hi SLEPC-in cheng vaibelchhe 4 leh nuai 39 a pek hmangin kum 2012 November thla khan tan a ni a. Kum 2016 khan sum pek chhuah hi hman ral vek a ni tawh chungin hna thawh tur za zela 70 chauh thawh hman a ni.
