Assembly speaker pu lalbiakzama’n phuaibuangah ‘tlaizawng paradise’ zan khatna a hmanpui
Tourism department hmalakna a Phuaibuanga buatsaih, ni hnih awh tur Tlaizawng Paradise zan khatna chu bialtu MLA Pu Lalbiakzama, Speaker, Mizoram Legislative Assembly chuan khuallian niin a hmanpui. Pu Lalnghinglova Hmar, Minister, Tourism department chuan tawiawmin Phuaibuang mipui leh khualzin thahnem takin he hun hi an telpui a ni.Speaker Pu Lalbiakzama chuan Anthurium leh Hnahsin bakah pangpar hming chawia hunpui buatsaih pathumna ni turin Tlaizawng Paradise thlan a ni chu thil chhinchhiah thlak tak a nih thu a sawi a. Mizoram pangpar zinga hmun pawimawh tak luahtu, hla phuahtute pawh ina vawi tam tak hla thua an zeh tel thin pangpar a nih avangin tih lara zin mi tam zawk hip thei khawpa hmalak zel a pawimawh thu a sawi.
Assembly Speaker chuan Phuaibuang khua leh a chhevel sik leh sa awm danin a zir avangin zin mi tam zawk hip thei turin Tlaizawng phun belh zel turin kalkhawmte a chah a. Khualzinte kaltlanga eizawnna hrang hrang siam nan leh Tourist hmanga khawtlang tihmasawn tur chuan khualchhawn thiam khawtlang nih a tul thu a tarlang a. Khualzin dawl zo tura thlen in tha, ei leh in lam theihna, khualzin dawnsawn leh kaihhruai kawnga thiamna bik nei mi (Tour Guide) an awm a tul bakah khawtlang hawizau, hawihhawm leh tangrual nih a ngaih thu a sawi a. Phuaibuanga ‘Tlaizawng Paradise’ tum khat hmanna atang hian zir chhuah tur tam tak a awm thu Speaker chuan sawiin phuisui zawka buatsaih a nih zel theih nan khawtlang mipuite thawhho puiah a sawm bawk a ni.
Pu C.Lallianzama, President, Phuaibuang Village Council chuan Tlaizawng Paradise chhim tura mikhual chhinchhiah mi sang khat an chuang tih a sawi a. Tlaizawng par vul hun lai tak pel tawh mahse Tlaizawng Paradise puala hun hmanna hian Phuaibuang chu Tlaizawng vulna hmunpui a nih zia a phochhuah thu a sawi bawk a ni. Tlaizawng Paradise zan khatna ah hian Phuaibuang khaw mite kutchhuak thil chi hrang hrang leh eiturte phochhuah a ni a. Zaithiamte an zai bawk a ni.
