ASF hri vangin vawk 521 an thi a, vawk 107 suat an ni
Tun hnai lawka African Swine Fever (AFS) hri a len thar leh tak avangin he vawk pulhri avang hian vawk 521 thi leh tawhin vawk 107 suat a ni leh tawh bawk niin Vety department hotute chuan an sawi. Vawiin khan Mamit district a Zawlnuam khua-ah vawk 4 a thih belh leh a, Lawngtlai khua a veng 2-ah vawk 7 thi-in Bungtlang South khua-ah 1 a thi bawk a. Vawiina vawk thi zawng zawng hi 12 a ni a. Zawlnuam khua-ah AFS vawk pulhri vei 13 suat a ni bawk.
Tun dinhmunah hian Lawngtlai district leh Mamit district a khua leh veng 13-ah a leng mek niin Vety department hotute chuan an sawi a ni. Nikum December ni 24 atanga ni 80 chuang ASF vawk pulhri avanga vawk thi leh suat a awm tawh loh hnu-ah March thla laihawl vela vawk thi report dawn a nih leh tak avangin vawk thi leh damlote sample endik hnu chu Guwahati laboratory-ah thawnin March ni 20 khan African swine fever vawk pulhri vang a ni tih a rawn finfiah ta a ni.
Kum 2021 chhunga vawk suatsak chhugkaw 2,488 hnenah zangnadawmna hi kum 2022 ah pek an ni a. Kum 2022 chhunga vawk suat chhungkaw 1,915 hnenah za zela 25 chu kum 2024 ah te pek an ni a. Kum 2021 a suatte hnenah cheng vaibelchhe 11, nuai 69, sing 9 leh sang 4 pek chhuah tawh niin kum 2022 a suat sakte hnenah cheng vaibelchhe 2, nuai 63, sing 3, sang 1 leh 500 pek an ni tawh a, a vai-in cheng vaibelchhe 14, nuai 33, sing 2, sang 5 leh 500 pek a ni tawh a ni.
