Art&Culture Minister-in High School leh Higher Secondary School Zirlaite tana Hnam Lam intihsiak kharna hun hmanpui
Vawiin khan Art&Culture Department changtu Minister Pu C. lalsawivunga chuan Vanapa Hall-ah Art&Culture Department leh Mizo Cultural Organisation (MCO) tangkawp buatsaih, High School leh Higher Secondary School Zirlaite tana Mizo hnam lam intihsiak hmawrbawkna hun (closing function) chu khuallian niin a hmanpui a. Intihsiakna lawmman a sem nghal bawk a ni.
He hunah hian khuallian Art&Culture Minister Pu C. lalsawivunga chuan thusawiin, Zirlaite zinga hnam nunphung pawimawhzia inzirtirna ni fawma intihsiakna hlawhtling tak buatsaih a ni chu lawmawm a tih thu a sawi a. Zirlai kalkhawmte chu Mizo hnam nunphung (culture) vawng nung leh tihmasawn zel tura chahin, hnam ropui apiangin mahni hnam nunphung an ngaisang thin tih a sawi a. Mizote chu zai leh lam ngaina tak hnam kan ni tih sawiin, chung thilte chu khawvel mithmuha pho lan tlak khawpa chawisang zel turin kalkhawmte chu a fuih a. Zai leh lam baka Mizo hnam rohlu aia upate zahna chu uar thar leh zual tura Zirlaite chu chahin, Mizo nula tlangval, aia upa zah thei tak, ruihtheihthil laka fihlim nih tum theuh turin a chah bawk a ni.
Vawiina intihsiakna buatsaih hi High School leh Higher Secondary School zirlaite zinga Mizo hnam lamte inzirtirna leh a pawimawhnate inhrilhhriatna atana tih a ni a. Intihsiakna atan hian Mizo hnam lam thenkhat Buhza Aih, Cheraw leh Chheihlam te chu thlan chhuah a ni a. Intihsiaknaah hian Govt. Mizo High School chu pakhatna niin, anni hian pawisafai Rs. 50000/ an dawng a. Greenland Higher Secondary School leh St. Paul’s High School-te chu pahnihna leh pathumna niin, pahnihnain Cheng singthum leh pathumnain cheng singhnih ve ve an dawng a ni.
Intihsiak kharna puala hun hman hi Pi Carol VLMS Dawngkimi, Director, Art&Culture department chuan kaihruaiin kalkhawmte lawmna thu a sawi a. Pu Lalbiakhlua, General Secretary, Mizo Cultural Organisation chuan intihsiak chungchang report pein, intihsiak lawmman semin a zui a. Pu F. lalthanmawia, Jt. director, Art&Culture Department chuan lawmthu sawiin hun hi a khar a ni.
