Aizawla lirthei zuartuten GST Rate thar hman chu mipui tan malsawmna a thlen dawn an ti

Sorkar laipuiin GST rate a tihhniam thar chuan lirthei ke hnih nei leitu mipuite tan awlsamna leh hlawkna tam tak a thlen an beisei thu Aizawla lirthei ke hnih nei zuartute chuan an sawi.

Yamaha showroom-a thawktute chuan an scooter leh bike man bakah spare parts man pawh a tlakhniam vek thu an sawi a. An scooter man to hret ho ah cheng sing 1 sang 3 bawr leh bike-ah cheng sing 1 sang 7 bawr chhoa a man a tlakhniam bakah spare parts man pawh a tlawm vek nghal thu an sawi a. Hei hian an lirthei hralh pawh a tipung hreta an hriat thu sawiin GST rate hniam chu mipuite tan pawha a zangkhai zawk hle ni a an hriat thu an sawi a ni.

Amawii Hero pawhin GST rate thar avanga lirthei man tlahniam nghal vek chuan mipuite tana hlawkna a thlen dawn thu sawiin a bik takin mi harsa zawk lirthei lei tum te tan chuan GST rate thar avanga lirthei a tlawmna chu hlawk tham tak a nih thu an sawi a. An lirthei tam zawk chu 350cc hnuailam a nih avangin GST hniam hlawkna tel theihna a nih deuh vek thu an sawi a. A chawhrualin cheng sang 7 sang 8 chhoa an lirthei man a tlawm thu leh lirthei man to hretah chuan a tlawmna pawh a tam ve zel thu an sawi a ni.

Tunhnaia Aizawla lirthei ke hnih nei pung nasa tak electric two-wheeler siamtu zinga company pakhat Ather hralh chhuaktu MST Motors te chuan anmahni bikah chuan a tir atanga sorkar laipuiin electric hmang lirtheia GST nasa taka a tihtlem, zaa 5 chu tihdanglam lohin an la hman zel thu an sawi a. Sorkar laipui atanga tihdanglam tumna hriat an neih rih loh thu sawiin hetihrual hian miin an scooter thar an leia an vuah tel tur hrang hrang, accessories erawh chu sorkar laipuiin tunhnaia GST rate a tihhniam avangin a man a tlawm vek thu an sawi a. A lirthei manah a hniam sa avangin danglamna awm lo mahse accessories a tlawm tak avangin an hnen atanga electric scooter lei te tan chuan a hma aia an thil vuah tel azira a man a tlawm zawk thu an sawi a ni.