AGRICULTURE MINISTER-IN MIZORAM KHAW HRANG HRANGA LONEITUTE HMAN TUR LEI THA (FERTILIZER) PHURTU LIRTHEI VAILIAM
Vawiin khan Pu P.C. Vanlalruata, Minister, Agriculture Department chuan loneitute hman tur lei tihthatna (fertilizer) phurtu lirthei chu Ch. Saprawnga truck terminal Rangvamual atangin a vailiam.Minister Pu P.C. Vanlalruata chuan thu sawiin India ram hi khawvela mihring tamna ber a nih angin, buh leh bal kan mamawh pawh a sang em em a ni, a ti a. Thlai chinna leilung a dak tawh em avangin, buh leh bal thar chu kum tinin a tlak hniamzel thu a sawi a. Loneituten thlai tam zawk an thar theih nan lei tihthatna (fertilizer) hman a ngai a, amaherawhchu fertilizer hi thil man to tak, farmer-ten an lei phak loh a nih thu a sawi a. Loneituten fertilizer tlawm taka an lei theih nan India sawrkar laipui chuan kum 1957 khan ruahmanna thar siamin, fertlizer siamtu company-te hnenah a siam man hi India sawrkarlaipui chuan 90% dawn a pek sak thu a sawi a.
Minister chuan Sawrkar laipui thuchhuah zawmin Mizoram chuan Agriculture Department kaltlangin kan thlai chinna ram zau zawng mil leh thlaichinna leilunga thlai chaw awm zat (Soil Fertility) milin sawrkar laipuiah report a pek thin thu leh chutiang chuan kumtin sawrkar laipui atangin Mizoram chanvo fertilizer loneituten tlawm taka an lei theih tur a dawn thin thu a tarlang a. Mizoram quota fertilizer hi a chanvo neitu loneituten MRP ngeia an lei theih nan leh hnianghnar taka an hmuh theih nan sawrkar chuan theihtawp chhuahin, ram danga dan lova fertilizer thawnchhuah thin titawp tur hian nasa takin hma a lak mek thu a sawi a. District hrang hranga Fertilizer Inspector, Police leh Magistrate-te nen tangkawpin heng dan lova leitha thawnchhuak thinte uluk taka vil reng an nih thu a sawi a. Kumin 2025 chhung hian leitha dan lova sumdawnna atana hman tur Urea Bag 5424 leh DAP bag 300 zet man a nih tawh thu a tarlang a ni.
Loneituten man man, hnianghnar leh an mamawh huna fertilizer an hmuh ngei theihna turin Mizorama fertilizer dealer pakhat MAHFED Ltd. kaltlangin Urea-Bag 11200, TSP Bag 1800 leh MOP Bag 1000 te chu Minister chuan a vailiam a. Heng MAHFED Ltd. hnuaia fertilizer zawrh chhuah turte hi a mamawh tak tak ten an lei theihna turin uluk taka vil zui reng a ni dawn a. Fertilizer hi sawrkar ruahmanna angin MAHFED Ltd. kal tlang chauha lei theih tur a ni a, hriatchian duh nei tan MAHFED Office-ah zawh chian theih a ni. Vawiin hunah hian Pu John LT Sanga, Registrar, Co-Operative Society leh Pu H. Lalbiakkima, Deputy Director, Fertilizer te an tel a ni.
