Agriculture Minister hoin Horticulture College din champhaphak lawm
Vawiin khan College of Horticulture Thenzawl din champhaphak vawi 9-na lawmna chu Agriculture Minister Pu PC Vanlalruata hovin Academic cum Administrative building, College of Horticulture ah hman a ni.
Pu PC Vanlalruata chuan, College of Horticulture Thenzawl din champha vawi 9-na lawm theia an awm chu thawktute leh zirlai te thahnemngaihna vang a ni tiin a lawmpui thu a sawi a. “Zirtirtu ṭha tak tak leh state hrang hrang aṭanga lokal zirlaite thawhrimna avangin college hi zirna ṭha tak leh zirlai ṭha tak tak chher chhuak tu a lo ni ta” a ti a. Mizoram tan hmasawnna thlentu pawimawh tak a la ni chho zel dawn, a ti. Agriculture lama zirna leh thiamna te hi loneitute leh kuthnathawktute hlawhtlinna thlentu a ni tiin Pu PC Vanlalruata chuan he college ngei pawh hian an thiamna hmangin kuthnathawktute vawi tam tak an lo tanpui tawh thin a ni a ti a. “In thiamna leh theihna te Mizoram mipui tan tangkai taka hmang chhunzawm turin ka ngen che u a ni” a ti bawk.
Dean Dr. Shri Dhar pawhin thu sawiin horticulture chu Mizoram ah development thlentu pawimawh tak a ni, a ti a. Mizoram ei leh bar zawnna kawngah hmasawnna chak lehzuala kan hmuh theihna tur a nih a beisei thu a sawi bawk.
College of Horticulture hi June ni 18, 2016 khan Selesih ah din tan a ni a. Kum 2019 July ni 1 atangin tuna an awmna Thenzawlah hian an awm tan a. Campus hi Hectare 120.38 a zau niin teaching staff 13, non teaching staff 6 leh contractual staff 16, security 12 an awm mek a ni. Zirlai mipa 39, hmeichhia 57 an vaiin 96 an awm mek bawk. College of Horticulture ah hian Mizoram in seat 6 quota a nei mek a ni.
