Agriculture & Farmers’ Welfare Minister-in Central Plantation Crop Research Institute, Guwahati tlawh

6 months ago Sonakshi Sarkar

Agriculture & Farmers’ Welfare Minister Pu PC Vanlalruata chuan vawiin khan Central Plantation Crop Research Institute (CPCRI), Guwahati chu tlawhin Dr. Alpana Das, Principal Scientist leh a thawhpui scientist te nen inkawmhona hun tha tak an hmang. CPCRI hi cocoa research centre a ni a, grafted seedlings siamna a ni bawk. Scientist te hian cocoa chungchangah power point presentation hmangin minister hi an hrilhfiah a, hemi hnu hian field a an hmalakna te minister hi an tlawhpui a ni.

CPCRI scientist te chuan Mizoram-ah cocoa plantation kalpui a nih dawn chuan theihtawp chhuaha puih an inhuam thu Minister hi an hrilh a ni. Scientist te chuan kum 35 kalta atang khan cocoa zirchianna an lo kalpui tawh thu sawiin, a seedlings tha thawnchhuah chungchangah Meghalaya leh Arunachal Pradesh sawrkar te nen MoU an ziah tur thu an hrilh a, Pu Ruata chuan Mizoram sawrkar nena thawhhopuiah sawm nghalin, anni chuan grafted seedlings pawh pilot project atan eng emaw zah pek an intiam bawk a ni.

CPCRI scientist te chuan cocoa chi hrang hrang an lo zirchianna atangin NE bik tana cocoa chin tur variety tha bik an hmuchhuah thu minister hi an lo hrilh a, zirchianna nei hmasa lova farmer ten an hmuh ang ang an ching thin hian a nih tur ang an tharchhuah loh phah nasa thin hle tih an sawi bawk.