Adviser to CM Pu TBC Lalvenchhunga’n Champhaiah National Space Day vawi 2-na hmanpui
Adviser to CM (Finance & Planning) Pu TBC Lalvenchhunga’n vawiin khan Vengthlang Hall, Champhaiah National Space Day lawmnaah khuallian niin hun a hmang a, he hun hi Indian Space Research Organization (ISRO), North Eastern Space Application Centre (NESAC) leh Mizoram Remote Sensing Application Centre (MIRSAC) tangkawpin an buatsaih a ni. ISRO Scientist/Engineer Pu GVP Bharat Kumar chu khual zahawm a ni. Khuallian Pu TBC Lalvenchhunga chuan mahni khua ngeia khuallian a ni hi lawmawm a tih hle thu a sawi a, India rama scientist te’n van an thengreng zirna te, thil thar an hmuhchhuah te a ropui tawh em em a, ISRO leh scientist hmun hrang hrang ami te hnathawh hi a ngaihsanawm a tih thu a sawi a, khawtlang himna leh hmasawnna a nghawng thui hle a ni tih a sawi bawk.
Zirlaite hnenah thil tum ropui lua, nih tum ropui lua a awm lo tih sawiin sang tak thleng turin rilru an siam thei reng a ni tih a sawi a, science-a danglamna siamtu an ni thei a ni tiin a fuih a ni. Vawiin lawmna hun pawh an tangkai pui ngei a beisei thu a sawi a, theih ang ang zirchhuaka hmang tangkai turin a chah a ni. Khual zahawm Pu GVP Bharat Kumar chuan sawrkar hmalakna zarah ISRO pawn hma a sawn zel a, science leh zirnaa an hlawhtlinnaah a lawm thu a sawi. National Science Day pawh nikum atanga Prime Minister zahawm tak Pu Narendra Modi zarah hman a ni tih a sawi a, he lawmna programme buatsaihtute chungah lawmthu a sawi a ni. He lawmna hun hi hun thuma then a ni a, hun khatnaah hian MIRSAC CSO leh Member Secretary ni bawk Er. H. Lalsawmliana chuan khuhhawnna thu a sawi a, NESAC Scientist Dr. Rocky Pebam chuan National Space Day leh an lawmna hun chungchang a sawi.
MIRSAC Principal Scientist Pi Hmingthanpuii’n lawmthu sawiin hun khatna a khar a ni. Hun hnihnaah hian khual zahawm Pu GVP Bharat Kumar chuan Indian Space Programme hnuaia mission hrang hrang chungchang, a bikin Chandrayaan leh thla lawn tura India hlawhtlinna leh hmathlir te a sawi a, Dr. Rocky Pebam chuan van thengreng (space) zirna khawtlang tana a tangkaina te a sawi. Hun thumnaah hian zirlaite tan audio visual show leh space exhibition tihchhuah a ni a, scientist te’n inkawmna hun an hmanpui a, quiz buatsaih niin lawmman te sem a ni.
