Adviser to CM Dr KC Lalmalsawmzauva’n Lunglei Pukpuia sawhthing sawngbawlna hmun dinna tur a hmunah a tlawh
Mizoram sawrkara Adviser to Chief Minister (Implementation of Handholding Policy) Dr KC Lalmalsawmzauva chuan vawiin khan Lunglei Pukpuia Integrated Infrastructure Development Centre (IIDC) chu tlawhin, industry awm sate leh sawhthing sawngbawlna hmun dinna tur hmunhma te a enfiah. Adviser to CM hi Mizoram State Policy Coordination Committee (MSPCC) member-te – Pu LP Lalchangkima (ZIDCO Managing Director), Pu Zohmingthanga (MAMB Member) leh Pi Laldikkimi (MAMB Member) te, MAMB Co-opted Member Pi C. Zochansangi te’n an ṭawiawm a. Lungleia Commerce & Industries, Power & Electricity leh Information & Public Relations department-a officer leh thawktute’n an lo dawngsawng a. Pukpuia IIDC ram chhunga sawhthing sawngbawlna hmun, Ginger Processing Unit (GPU) dinna tur hmunhma te, kawlphetha leh tui mamawh atana inhmakhua dan tur leh thil pawimawh hrang hrang te en hovin, an sawi ho a ni.
Mizoram Bana Kaih (Handholding) Scheme hnuaiah kut hna thawktute sawhthing thar chhuah man man zawka hralh a nih theih nan leh a hlutna tipung turin sawrkar chuan Mizoram hmun ṭhenkhatah sawhthing sawngbawlna, Ginger Processing Unit (GPU) din tura ruahmanin, Lunglei pawh GPU din nan hian thlan a ni a. GPU dinna tur sum hi DoNER Ministry aṭanga hmuh beisei a ni.
Adviser to CM Dr KC Lalmalsawmzauva hian Lunglei IIDC-a industry unit awm sa leh a tihchangtlunna tur ruahmannate pawh a en nghal a. IIDC-ah hian industry unit 10 awm mekin, Promotion of MSMEs in NER & Sikkim Scheme kal tlangin cheng nuai 997.96 sengin Flatted Factory (factory space 24) sak belh mek a ni bawk.
