Horticulture Minister Pu C. Lalsawivunga’n Champhaiah Project Greenshield a hawng
Vawiin khan Horticulture Department Minister Pu C. Lalsawivunga chuan Circuit House Conference Hall, Champhai-ah District Transformation Programme hnuaia kalpui Project Greenshield a hawng. He project hi MGNREGA, MIDH leh RKVY PDMC scheme-te tangkawpa Champhai District-a kumtluana tomato tha leh tam zawk thar chhuah a nih theih nana hmalakna a ni.
Khuallian Pu C. Lalsawivunga chuan thu sawiin, Mizoram sawrkar flagship programme Bana Kaih hnuaia peng (component) panga-na, ‘Decentralised Plan’ hnuaia kalpui mek Mizoram District Transformation Programme kaltlanga Tomato chingtu ten hlawk zawk, quality tha zawk, awlsam zawk leh kumtluana tomato an thar theihna tura hmalakna ‘Project Greenshield’ hawn theih a ni chu lawmawm a tih thu a sawi a. He project a hlawhtlinna tura thawktu zawng zawngte – a bik takin Champhai DC Office, District Horticulture Office, Rural Development Department, Irrigation & Water Resources leh Tuipui khuaa Tomato chingtute chungah lawmthu a sawi a ni.
Mizoram sawrkar chuan District tin ten an district-a an ngaihpawimawh emaw an hnufualna emaw phuhru tura hma an lak theih nan Mizoram District Transformation Programme kaltlangin cheng nuai 100 theuh pek a ni a, kan hmalakna a that dan a zirin hei aia tam pawh la pek chhuah zel tura ruahman a ni a. Hei hi hre renga vawiina kalkhawmte leh district dang zawng zawng pawh theihtawp chhuaha hma la zel turin a chah.
Khuallian chuan sawrkar department hrang hrang te hian mawhphurhna hrang theuh nei mah ila, mipui rawngbawltu kan nih vek avangin tum thuhmun nei kan ni tih in hre thar theuh ila, thawhhona tha leh inpumkhatna tha nen theihtawp I chhuah ho zel ang u, a ti a. Hlawhtlinna chang tur chuan taimakna leh tumruhna nunchhuahpui a pawimawh thu sawiin, loneitute chu he project hi tangkai tak leh hlawk taka hmang turin duhsakna a hlan a. Mithiamte rawn chung zela thlai damdawi (chemical) hman a pawimawh thu sawiin, organic thei ang bera thei leh thlai ching turin a fuih bawk.
