Minister Pu P.C. Vanlalruata chuan PACS-te hnenah Computer a sem

Vawiin khan Registrar of Cooperative Societies Conference Hall, Aizawl-ah Centrally Sponsored Project – Computerisation of Primary Agricultural Credit Cooperative Societies (PACS) Phase-III hnuaia PACS Computerised tur 50-te hnenah computer set sem a ni a. He hun hi Cooperation Department changtu Minister Pu P.C. Vanlalruata chuan a hmanpui.

Minister chuan thu sawiin Cooperation Department-in theihtawp an chhuah avangin MPACS-te hnenah Computer an sem thei chu lawmawm a tih thu a sawi a. Sawrkar laipui leh Mizoram sawrkar ten PACS an ngaihpawimawh thu sawiin, Minister chuan PACS-te hi Mizoram hmel tidanglam theitu an ni, a ti. Vawiina an thil dawnte tangkai taka hmang turin leh kan society tan hmasawnna thlentu ni theuh turin kalkhawmte a chah.

Minister chuan vawiin programme-ah thalai tam tham tak an tel chu lawmawm a tih thu a sawi a. Cooperative Movement-ah thalaite pawimawh zia sawiin, theihtawp chhuah zel turin thalaite a fuih bawk a ni. Thawhhona tha neih pawimawh zia sawiin, Minister chuan Mizote hi thawkho thiam tak kan nih thu leh thawhhona tha neia, ram hmasawnna tan thawkho zel turin kal khawmte a chah bawk a ni.

Computerisation of PACS Project hi Ministry of Cooperation hnuaia Centrally Sponsored Project kalpui mek a ni a. Phase-III ah hian PACS 50 computerise turin thlan chhuah an ni a. Hemi atan hian field verification te neih a ni tawh. He Project-ah hian National Level PACS Software Vendor (NLPSV) atan ‘Intellect Company’ thlan niin, an ni hian India ram pumpuia computerised PACS te hman tur ERP Software-te siamin, chu chu Mizoramah pawh hman a ni. Hardware sem chhuah hmang hian ERP Software kaltlangin computerised PACS-te hian hna an thawk tawh ang. Hemi hma hian Phase-I leh Phase-II hnuaiah PACS 49 te chu computerised an lo ni tawh bawk. Hardware semte hi Sawrkar thuchhuah zawmin GeM Portal kaltlanga lei a ni a, supplier te hi ‘Synergy Systems’ Dimapur, Nagaland an ni.

He programme hi Registrar of Cooperative Societies Pu John L.T. Sanga chuan a kaihruai a, Deputy Registrar leh Nodal Officer ni bawk Pi L. Lalzidingi hnen atangin Technical Report ngaihthlak niin, PACS representative Pi Rualzakhumi (Chawlhhmun MPACS) leh Pu Lalhuliana (Zotlang, Lunglei MPACS) te hnen atangin thusawi ngaihthlak a ni a. Hemi hnu hian MPACS 50 thlanchhuahte hnenah Computer semna neih a ni a. Joint Registrar Cooperation Department Pu H.Vanhlupuia’n lawmthu sawiin he hun hi a khar.