Lungleiah LMC hnuaia Traffic and Transport Co-ordination Committee an ṭhu khawm
Vawiin khan Lunglei Municipal Council (LMC) hnuaia Traffic and Transport Co-Ordination Committee (TTCC) chu an Chairman, LMC Vice Chairman Pu K. Lalrinawma hovin Lunglei Convention Centre-a BoC Meeting Hall-ah an ṭhu khawm a. Lunglei khawpui chhunga lirthei tlan dan leh hun dan kaihhnawiha hma lakna tur leh lehkha lut hrang hrangte ngaihtuahin, an sawi ho.
He ṭhut khawmah hian TTCC Vice Chairman, LMC Ward No. IV Councillor Pu R. Lalramzauva; Member Secretary, LMC Chief Executive Officer (CEO) Pu Lalhmansanga; Police, PWD, Transport leh I&PR official-te; MJA Lunglei District leh YMA Sub-Headquarters Lunglei ai awhte leh Pu Lalduhawma, Ramthar te an tel.
LMC huam chhunga lirthei hun man (Vehicle Parking Fee) sum lut zaa za mipuiah let tura LMC Board of Councillors (BoC) ṭhu khawmin a lo rel tawh angin leh parking fee sum chu phal lohna hmuna lirthei hung leh riahte vil vengtu tur Traffic Warden rawihna atan leh khawpui chhunga thirhrui (cable) inthlung hnawk seng hawi leh chin felna atan hman tura a ruahman angin TTCC chuan a bawhzui dan tur a rel a. Traffic Warden rawih tur zat hi sum awm dan azirin LMC thuneitute’n lo ruahman se, August 2026 aṭanga rawih ṭan tum ni se, tih a ni a. Lunglei khawpui chhung Kikawn leh AOC inkar kawngpui dunga thirhrui zam hnawkte chu hrui thlungtu service provider-te nen a hmunah en hovin, a seng hawi leh chin fel dan tur a hma lama ruahman ni se, tih a ni.
LMC huam chhunga lirthei neite’n lirthei dahna in (garage) an neih kim hun atan September ni 30, 2026 bi tuk a nih angin, felfai zawka hma lak a nih theih nan garage nei leh nei lote zir chianna kalpui ṭha tih a ni a. Traffic Warden rawih fel an nih hunah Traffic Police te nen zir chianna hi kalpui ni se, tih a ni.
