Education Minister-in PUC Atanga Zirlai Pass Tharte Lawmpuina Hun Hmanpui
Vawiin khan Higher & Technical Education Department changtu Minister Dr. Vanlalthlana chuan Pachhunga University College Multipurpose Auditorium-ah, Mizoram University-in under graduate result-a tih chhuah taka PUC atanga zirlai pass tharte lawmpuina ‘felicitation’ programme chu khuallian niin a hmanpui a; College Magazine ‘Buannel’ a tlangzarh nghal bawk a ni.
He hunah khuallian H&TE Department changtu Minister Dr. Vanlalthlana chuan Zirlaite fuihna leh lawmpuina thute sawiin, Zirlaite chu ram leh hnam in a ko tih hre reng turin a chah a. Resources tha tak tak an neihte hman thiam zir zel turte, chung resource-te chu kalphung changtlung zawk nena enkawl tur tea fuihin, khawvel zau zawka inzar pharh leh hawi chhuak ve ngam turin a chah a. An thlen chin chu an zinkawng intanna chauh a ni tih hre turin a fuih bawk a ni.
Vawiina lawmpuina hlan takte hi BA pass thar mi 401, B.Sc pass thar mi 209 leh B.Com pass thar mi 55-te bakah BBA pass thar mi 35, an zavaiin mi 708 an ni a. Zirlai pass thar zawng zawngte hi chawimawina thuchei leh thilpek hlan vek an nih bakah, huang hrang hranga mimal titha zualte pawh chawimawina thilpek hlan nghal an ni bawk a. Heng chawimawina thilpekte hi stream hrang hranga titha zualte hnenahte, Students’ of the year leh Library hmang nasa ber hnenahte hlan a ni.
Kuminah hian PUC atangin exam beitu mi 791 zingah 708 an pass a, zirlai 83 chu hlawhtling zo ta chiah lovin, pass percentage hi 89.90% a ni a. Kumin result-ah hian PUC atangin rank holder mi 122 lai awmin, subject topper mi 12 an awm a. Science lamah Laltluangpuii, Physics department chu Gold Medalist a ni.
