Thingtlang High School-te internet pek nan School Education Department leh BSNL-ten inremna ziak
Vawiin khan School Education Minister Dr. Vanlalthlana kaihhruaina hnuaiah School Education Department leh Bharat Sanchar Nigam Limited (BSNL) te chuan Mizoram thingtlang (rural area)-a High School-te high-speed internet pekna tur Memorandum of Understanding (MoU) an ziak. He inremna hi kum 5 chhung awh tur a ni.
He thawhona thuthlung hi School Education Department aiawhin Commissioner & Secretary Pu K. Lalthawmmawia, Additional Secretary Pi Zothantluangi leh State Project Director Pu C. Lalthanzira ten hming an ziak a. BSNL aiawhin Pu BP Meena, General Manager leh Deputy General Manager Pu Biakthianghlima Chenkual-ten hming an ziak a ni.
He MoU-in a tum ber chu Sawrkar Laipui ruahmanna, Amended Bharatnet Program (ABP) hnuaia Digital Bharat Nidhi (DBN) incentive scheme kal tlanga thingtlang High School-te Fibre-Technology-To-Home (FTTH) hmanga internet chak zawk pek a ni.
Minister Dr. Vanlalthlana chuan thu sawiin, SED-in he MoU an sign chhan a sawi a. Khawpui leh thingtlang kilkhawra zirlaiten khawvel thiamna inang tlang an dawn theih nan internet leh technology avanga zirnaa inthlauhna (digital divide) awm mek tihbo nan he hmalakna hi a pawimawh hle tih a sawi. Tunlai khawvelah zirna kaihhnawiha inrelbawlna kalpui nan internet a pawimawh tawh hle tiin, real-time data monitoring (UDISE+ leh online portal dangte) hlawhtling taka thehluh a nih theih nan leh, zirtirtute thiamna tihhmasawn nan school-ten internet rintlak an mamawh tak zet a ni, a ti.
Thawhhona thuthlung ziaktu School Education Department leh BSNL hotute chuan Mizoram thingtlang school-te thuamchak a, zirlaite leh zirtirtuten tunlai thiamna hmanga digital khawvel nen inthlunzawmna tha zawk an neih theih ngei an beisei a ni.
