RD&AD Minister Prof. Lalnilawma chuan VB-G RAM G a hawng

Vawiin khan Mizoram sawrkar hnuaia Rural Development & Administrative Department (RD&AD) buatsaihin VIKSIT BHARAT – GUARANTEE FOR ROZGAR AND AJEEVIKA MISSION (GRAMIN): VB-G RAM G hawnna hun Vanapa Hall-ah neih a ni. He hun hi RD&AD Minister Prof. Lalnilawma chuan khuallian niin a hmanpui a, VB-G RAM G hawnna a nei nghal a ni.

Khuallian Prof. Lalnilawma chuan kalkhawmte chibai a buk a, ni 100 inhlawhna mipuiten an hman ṭangkai dan te a sawi a. VB-G RAM G pawh Mizoram sawrkarin a hlawhtlin theih nan theih tawp a chhuah nghal a, India ram pumah a scheme notification chhuah hmasa ber RD&AD Mizoram an nih thu a sawi. State sawrkarin VB-G RAM G a tum ve tur cheng vaibelchhia 128 pawh CM leh finance lam ten ngaipawimawhin, sum lamah pawh harsatna a awm dawn loh thu a sawi bawk a ni. A hlawhtlinna tak tak erawh mipui te, VC te, official te thawhhonaah a innghah tur thu a sawi.

Minister chuan India-in zalenna a neih kum 100 a tlin lawmna kum 2047-ah chuan India chu developed country a hlan kai tum anih thu a sawi a. MGNREGA scheme-ah chuan Ni 100 inhlawhna leh Community assets din a ngaipawimawh a. VB-G RAM G ah erawh chuan India kum 2047-a ram changkanga hlang tura a ruahmannaah mipuiten mawhphurhna kan nei a ni a ti.

Minister chuan VB-G RAM G scheme-in a ngaihpawimawh pakhat chu Tui hnianghnar taka neih (Water security) a ni a ti a. PHE nen ṭangkawpin tuikhuah rintlak tak siam an tum thu a sawi a, India leh Israel sawrkar ṭangkawpin Mizoramah tui hnianghnar taka a awm zel theih nan hmalakna kalpui mek a nih thu a sawi bawk. He scheme thar hnuaiah hian ni 125 inhlawhna hi mipuite eizawnna nen inkungkaih tlat niin department dangte nen ṭangkawpin changtlung zawk eizawnna duang tura hmalakna kalpui mek a nih thu a sawi bawk.