Consultation Meeting with Stakeholder on Mobilization for AIDS Suraksha, Aizawl District
Vawiin khan DC Pisapui Hall-ah Aizawl District-a HIV/AIDS dona kawnga chak zawka hmalak dan tur inrawnkhawmna meeting neih a ni a. Pu Zoramsiama Hmar, Additional DC chuan meeting kaihhruaiin, Pu Pradeep Kumar, National Consultant, National AIDS Control Organization (NACO) leh Dr. Jane Ralte, Project Director, MSACS ten an telpui.
Inrawnkhawmna kaihruaitu Pu Zoramsiama Hmar, Addl DC chuan thalai leh kum naupang zawkte zingah nasa zawka awareness kalpui a pawimawh thute, HIV hrik pai ten enkawlna tha taka an lak theih nan, HIV hrik pai te thinhrikna leh diriamna kan paihbo a hun tawh thu a sawi a, Pu Pradeep Kumar, National Consultant i/c Statistics, NACO chuan HIV chungchanga Mizoram dinhmun zirchianna presentation hmangin a tarlang a, zirchianna atanga a landanin Mizoram chu India ram pumpui HIV dinhmun aiin a let 15 zet in a sang zawk a, kum 2025-2026 chhunga Mizorama HIV hrik pai hmuhchhuah zingah Aizawl district a mi an tam ber a, Aizawl district chu a bupuiber a nih avangin nasa taka tan lak a ngaihthu a sawi.
Vawiin inrawnkhawmnaah hian HIV chuan thliar bik neilovin mipui nawlpuiah a luh tawh thu leh, mipui mimirah nasa taka adarh kual tawh thu tarlan a ni. HIV hrik pai hmuhchhuah zinga 76.3 % zette chu sex atanga kai an nih thu leh HIV maibakah Dâdu(Syphilis) vei pawh an tam thu tarlan a ni. Mizoramah HIV hrik pai mahni inhre lo leh hmuhchhuah loh tam tak an la awm tih tarlan a ni a, HIV hrik pai zawng zawng zinga za 95 tal in an dinhmun an hriat a, enkawlna an dawn theih nan nasa taka hmalak a tul thu leh, HIV hrik pai hmuhchhuah tlai lutuk avanga thil tha lo zawk thleng thin pumpelh nan nasa taka HIV testing kalpui a tul thu tar lan a ni bawk. Kalkhawmte chuan HIV dona kawnga chak zawka hmalak dan tur ruahmanna an siama ni.
Dr. Jane Ralte, Project Director, MSACS chuan MSACS a thawktute bak ah, kohhran leh khawtlang in theihtawp chhuaha HIV dona kawnga hma an lakna chuan rah tha a chhuah mek tih sawiin, Mizoram-a HIV kai thar hmuhchhuah chu kum tin a tlem ve hret hret tih a tarlang a, chutih rualin, HIV dona kawngah tha thlah theih a nih loh thu leh HIV kai thar awm lo tura nasa zawka kan beih chhunzawm zel a tul thu a sawi bawk.
