Minister Pu B. Lalchhanzova’n Champhai chanchinbu mite a kawm
I&PR Minister Pu B. Lalchhanzova chuan tukin khan Chanchinbu mite Press Club Champhaiah a kawm.
Chanchinbumite chuan Aizawl pawn District hrang hrang atanga MJA khawmpui leh pawimawh thila member Aizawl kalte tana riah theihna tur hmun buatsaih sak turin an ngen a, I&PR Department Champhai in anmahni puala Office an la nei lo chu hmalaksak vat turin an ngen a, hei bakah Office staff indaih lohna awm ni-a an hriatte hnawhkhahsak thuai turin Minister hi an ngen bawk.
Sum zawnna atana tunlaia a hman apiangin Youtube hmanga chanchin thar rintlak loh leh finfiahna awm mumal lo te, thlitfim pawh ni lem lova tihchhuah thin te hi tihtawp a nih theihna tura hmalak a tul thu te an sawipui bawk.
Hei bakah hian a deparment chan pahnih – Civil Supply Office leh Land Revenue & Settlement Department chak zawka a kal theihna tura hmalak theihna awm ni-a an hriatte an tarlang a, Supply Department bikah Retailer ten ration buhfai an pekchhuah chungchangah dik tawk lo awm thin chungchang an sawipui a, Minister chuan dik lo awm ni-a an hriatah mipuite’n aw an chhuah a tul thu a sawi a, khawla kutzungpui nem lo te’n a thlalehah buhfai an la thei lo tia Retailer te’n an sawi thin chu mipui te bumna a nih thu a sawi a, thla 10 chhung kutzungpui an nem lo a nih chuan paih theih an ni a, thla 10 a tlin hma chuan kutzungpui nem lo mahse an chanpual chu retailer te hian an dah tha reng tur a nih thu a sawi a, kutzungpui nem hman lo ten thlalehah ration buhfai an la thei lo a nih chuan retailer ten an ei ru tihna a nih thu a sawi.
Revenue kaihhnawih bikah Revenue Minister chuan hnathawk an tlem avanga an indaih loh thu a sawi a, kuminah Surveyor 40 lak a nih tur thu leh Champhai ah pawh dah an nih tur thu te, stake holder te nen inhmukhawm a, Champhai phai zawl phei tangkai zawka hman theih dan turte sawiho a tum thu a sawi bawk. Pu Remlalliana PS to Minister pawhin Revenue Department a hna tang tam lutuk tihziaawm na turin Aizawla kalpui mek E-RAM chu Champhai ah pawh nakkum lamah chuan kalpui theih a beisei thu a sawi a, House Pass nei ten LSC a an leh dawn a ram teh that kher ngai thin chu Assembly thukhawm hmasa berah dan thar pharh a nih tur thu leh chu danah chuan ram teh that kher ngai hi paih a nih tawh tur thu a tarlang ve bawk.
I&PR Minister chuan I&PR Department ram nimin lama a en tawh thu leh M Plan hmanga proposal awm mek pawh bawhzui a tum thu a sawi a, Staff indaih lohnaah pawh theihtawp chhuah a tum thu a sawi a ni
