Addl. DC Hovin Kolasib District Chhunga National Highway (NH-306 & 06) Thawmthat Hna Endik A Ni
Vawiin khan Pi B Malsawmtluangi,Kolasib Additional Deputy Commissioner (Addl. DC) hovin Kolasib District chhunga National Highway (NH 306 & 06) thawmthat leh siamthat hna (STMC works) thawh mek chu a hmuna fankual leh endikna (Joint Inspection) neih a ni a. He endikna hi Diakkawn atanga tanin Vairengte lam leh Khamrang lam kawngte fan kual a ni.
Tun dinhmunah Kawngpui hi a tlangpui thuin lirthei tlan nuam tawk tura siam a ni tawh hlawm a. Amaherawhchu, hmun engemaw zatah tlan harsa khawpa chhe zual lai a la awm bawk. Hemi chungchangah hian kawng siamtu NHIDCL hotute chuan report pein, kawng chhe zual bikte hi tui put vang leh a hmun leilungin a zawh loh (soil condition) vang hrim hrima chhe hma bik a nih thu an sawi a. Heng hmun chhe zual tak takte hi concrete pavement tura rawtna (proposal) pawh thehluh a nih tawh thu an tarlang .
Addl. DC chuan kawng siamtute chu theihtawp chhuaha hma la zel turin a chah a. Khualzin leh lirthei tlante himna leh awlsam nan kawng chhe zualpui laite chu endika chhinchhiah (identify) zung zung a, a rang thei ang bera thawmthat hna thawk thuai thin turin a ngen a ni. Mipui mimir ten harsatna lian tham an tawh loh nan hmalak zung zung a pawimawh thu a sawi bawk.
Vawiina NH 306 & 06 Joint Inspection neihah hian Addl. DC hi Executive Engineer, PWD, NHD-III, Kolasib,NHIDCL-PMU, Kolasib aiawhte leh STMC Contractors ten an tawiawm a ni.
