Tlabungah YMA Section fai inelna lawmman sem a ni
Vawiin khan BDO Conference Hall, Tlabungah Tlabung Sub-Divisional Officer (Sadar)/Block Development Officer Pu Moses Lalfakawma Tlau kaihhruaina hnuaia din Clean Keeping & Progressive Tlabung Committee (CK&PTC)-in June ni 12, 2016-a a buatsaih Tlabung khaw chhunga “YMA Section Fai Ber Inelna” lawmman semna hun hman a ni a.
Tlabung khaw chhunga Sawrkar Office hotute, Village Council (VC) leh tlawmngai pawl (NGO) hruaitute leh kohhran hrang hrang puipate nen Tlabung khaw chhung faina kawnga hmasawn zel dan tur sawi ho nghal a ni.
Tlabung SDO(C) Pu Moses Lalfakawma Tlau chuan faina kawnga Tlabung khua leh a chhehvelte hmasawnna hmuh theiha a awm chu lawmawm a tih thu a sawi a. Hmasawn zel turin Tlabung mipuite’n theihna an neih thu sawiin, faina kawnga theih tawp chhuah zel turin mipuite a chah.
