Health Minister Pi Lalrinpuii leh P&E Minister Pu F Rodingliana ten Aizawl Civil Hospital leh Zoram Medical College power supply tihchangtlunna tur en
Vawiin khan Health & Family Welfare Minister Pi Lalrinpuii leh Power & Electricity Minister Pu F Rodingliana ten Mizorama damdawi in lian pahnih kan neih Aizawl Civil Hospital leh Zoram Medical College chu tlawhin heng damdawi in lian pahniha chhum lo chat lova power supply pekna tur leh hmalakna tur hmachhawp dangte a hmunah an en.
Aizawl Civil Hospital chawmtu tur bik dedicated power line siamna hnathawh bul tan dan tur Minister te hian an en a, ruahman dan chuan Aizawl Civil Hospital powerline hi direct in Indoor Sub-Station atanga lak tur a ni a, hemi atan hian cheng vaibelchhe 1 chuang ruahman a ni. Power supply khaihlak thulha hospital pumpui chawm thei tur 500 kVA diesel generator dahna tur hmunte enho nghal a ni a, diesel generator leina tur hi P&E Department kutah pawisa pek tawh niin bun fel thuai tum a ni. Hmun pawimawh zual- ICU, Blood Bank, Haemodialysis Unit leh Operation Theater te chawmtu tur power back up keng tel 20 kVA Solar Plant dahna turte an en nghal bawk a ni.
Aizawl Civil Hospital an tlawh zawh hian Minister-te hian Zoram Medical College & Hospital (ZMC&H) tlawh lehin NESIDS(OTRI) atanga sum hmuh cheng vaibelchhe 13 leh nuai 14 senga 1.5 MW Solar Plant dahna tur leh heta tanga kawlphetha siamchhuahte ZMC chhunga semkualna tur KM 1 a sei distribution line leh 500kVA distribution transformer thar pathum dah belh dan turte a hmunah hian an ennghal a ni. ZMC a solar plant dah tur 1.5 MW atang hian 1.2 MW hi On-Grid tur niin, .3 MW hi Hybrid Mode vuah tur a ni.
