PWD Minister Pu Vanlalhlana chuan Terei Lei leh Langkaih Lei a hawng

Vawiin khan PWD Minister Pu Vanlalhlana chuan Terei Lei-Bairabi atanga Zamuang kawnga siam leh Langkaih Lei-Mizoram-Tripura panna lei chu a hawng a,Pu Lalfamkima, Deputy Speaker leh Pu T.Lalhlimpuia,Lunglei West MLA te chuan an tawiawm.

Minister chuan vawiin ni chu hun hlimawm leh chhinchhiahtlak a nih thu sawiin he lei hi hma kan sawnna atana inzawmna siamtu a nih ngei a beisei thu a sawi a,lei kan hawng mai niloin mipuite hnena kan thutiam kan hlen entirna pawimawh tak a ni a ti. Pu Vanlalhlana chuan he lei siam kawnga nasa taka hmalatu PWD chungah chuan lawmthu sawiin mipuite rintlak leh innghahna tlaka hna thawk chhunzawm zel turin a chah a.Sawrkar hnathawkte chu mipui rawngbawltu kan nihna hre rengin kan mawhphurna chu hlenchhuaka ram hmasawn nan theihtawp kan chhuah a ngai a ni a ti.

Pu Vanlalhlana chuan Mizoram tana Lei pawimawh pahnih hawn a ni chu lawmawm a tih thu sawiin ram tan bung thar pawimawh tak a ni a ti a,state thenawm Tripura nena inzawmna tha kan neih zelna tura ruahman Langkaih Lei chu “Ramri Lei” tia vuahin inpawhtawnna a than zel ka beisei a ni a ti. Minister chuan Mamit district chu kawng engkimah theihna (potential) nei tha em em district a ni a,district chawikanga hmalam pan zel tur chuan mipuite chu taima leh mahni hnaa rinawm leh thahnemngai taka thawk zel turin a chah a, kawng tha neih a nih theihnan Sawrkar chuan nasa takin hma a lak thu a sawi bawk.

Vawiin hunah hian Deputy Speaker Pu Lalfamkima leh Pu T.Lalhlimpuia, Lunglei West MLA chuan thu sawiin heng Lei te hi khawtlang leh state thenawm nena in kal pawhna kawng pawimawh tak a ni dawn a, hmasawnna kawnga hmang turin mipuite chu an chah. Er Zoramliana Engineer-in-Chief,PWD chuan he hun hi a kaihruai a,PWD hotute bakah lei siam kawnga hmalatute hawnnaah hian an tel a ni.

Terei Lei(bridge) dawhna tur atan hian NABARD loan Rs 1365.60 lakhs chu ni 8.11.2016-ah hmuh a ni a, lei dawh hna hi M/s Sadguru Engineers & Allied Services Private Limited te hnenah ni 24.07.2017 khan pek a ni a, agreement amount chu Rs 1276.74 lakhs a ni. Teirei Lei hi double lane built-up steel girder bridge niin, Bairabi-Zamuang kawngah, Bairabi atanga 7.00km a awm a ni a, a vaia sum sen zat(expenditure) hi Rs 2765.60 lakhs( NABARD+ SASCI) a ni.

Langkaih Lei(bridge)dawhna atan hian NABARD (RIDF-XXIII) atangin loan Rs 2231.91 lakhs chu ni 29.01.2018-ah hmuh a ni a, kum 2018 khan tender chhuah niin M/s Sadguru Engineers & Allied Services Private Limited te hnenah he hna hi 27.03.2018 khan pek a ni a agreement amount chu Rs 2203.26 lakhs a ni. Langkaih lei hi Mizoram-Tripura border Kanhmun khaw chhung leh Damcherra khaw chhunga awm a ni.