Lungleiah Art & Culture hnuaia hnam lam leh zai Condensed Course zir chhuakte certificate hlanna hun buatsaih a ni
Vawiin khan Lunglei Venglaia Art & Culture Auditorium-ah Lunglei District Art & Culture Office buatsaih ni 45 chhung awh Mizo hnam lam leh zai zirna, 14th Condensed Course on Traditional Dance & Songs 2025–2026 hmawr bawkna leh a zir chhuakte hnena certificate hlanna hun hman a ni a. A&C Tribal Research Institute-a Senior Research Officer Pu RK Lalawmpuia chu Khuallian a ni.
Khuallian Pu RK Lalawmpuia chuan Art & Culture Department hnuaia hnam zai leh lam zir chhuak mi 19 te hnenah certificate a hlan a. Hnam lam leh zai zir chhuakte chu a lawmpui thu sawiin, certificate neihah chauh duh tawk mai lo va, inzir belh zel tur leh an thiamnate a bil mai loh nan a taka hmang chhuak zel turin a chah a. Hnam lam leh zai chu hnam ziarang pawimawh tak pakhat a nih thu leh humhalh leh chawi nun zel a ṭul thu sawiin, Mizo hnam ziarang leh nunphung dang – tlawmngaihna leh Zo nun ze mawi hrang hrangte nen lak hran theih loh, kal kawp tlat a nih thu a sawi a. Hnam lam leh zai zir chhuakte chu mahni telna awm pawla ṭha taka inhmang tur leh khawtlang, ram leh hnam tana mi ṭangkai nih tum zel tura chahin, hnam lam leh zai leh nun ze mawi hrang hrangte chu a taka nunpui a, dik tak leh pawlh dal lohva mi dang zirtir chhawng zel turin a chah.
He hunah hian Art & Culture-a thawktute, Condensed Course zirtirtute leh endiktute, zirlaite leh an chhungte, Mizo Cultural Artistes’ Association (MCAA) Sub-Headquarters Lunglei leh Mizo Cultural Organisation (MCO) General Headquarters Lunglei hruaitute an tel a. A&C Lungleia Senior Research Officer Pu Lalmuanpuia chuan hun kaihruaiin, 14th Condensed Course kalpui dan tlangpui a tar lang a. Lam zirtirtute, endiktute, MCAA leh MCO hruaitute aṭangin thu sawi ngaihthlak a ni a. Zir chhuakte’n lam leh zai chi hnih an entir bakah, Instructor & MCAA President Pi V. Lalrempuii’n pi pu zai hmangin kal khawmte a awi bawk.
