Lungleiah District Water & Sanitation Mission (DWSM) an ṭhu khawm
Vawiin khan Lunglei District Water & Sanitation Mission (DWSM) chu Additional Deputy Commissioner Pi Rochuangkimi Khenglawt kaihhruaiin Lunglei DC Conference Hall-ah an ṭhu khawm.
PHED Lunglei Sub-Divisional Officer (North) Er NT Jevis chuan thu ngaihtuah tur sawi zauvin, PHED Lungleia Swachh Bharat Mission–Gramin (SBM–G) District Coordinator Pi F. Lalrindiki chuan SBM–G hnuaia Lunglei District-a hma lakna hrang hrang report a pe a. SBM–G 2.0 hnuaia ODF Plus Model Village kalpui tura khaw hrang hrang dinhmun endik dan tur te, faina leh thianghlimna kawnga hmasawnna tur leh bawlhhlawh sawngbawl leh thehthang kawnga hma lakna tur hrang hrangte sawi ho a ni.
Vawiina Lunglei DWSM ṭhut khawma tar lan a nih danin, Lunglei District chhunga SBM–G hma lakna hnuaia khaw awm zawng zawng khaw 99 chu kum 2019 khan Open Defecation Free (ODF) Village-ah puan vek niin, kum 2023 khan ODF Plus-ah puan an ni vek tawh bawk a. SBM–G Phase–I leh Phase–II hnuaiah Lunglei District chhungah chhungkaw bil inthiarna (Individual Household Latrine) 26,680 sak zawh tawh niin, vantlang bawlhhlawh paihna (Community Solid Waste Management) 606 leh tui chhe paihna (Community Grey Water Management) 507 sak zawh tawh a ni a. Vantlang inthiarna (Community Sanitary Complex) 33 sak zawh a ni tawh bawk.
