Lungleiah Horticulture Department huaihawtin hralh sum atana pangpar chin dan zir hona buatsaih a ni
Vawiin khan Horticulture Department huaihawtin Lunglei District Horticulture Office Conference Hall-ah Lunglei District-a pangpar chingtute tan hralh sum atana pangpar chin leh enkawl dan inzirtirna hun buatsaih a ni.
Lunglei DHO Pu Lalṭhakima chuan hun kaihruaiin, inlawmna thu a sawi a. Lunglei District-a pangpar thar chhuah chuan a mamawhtute mamawh a la phuhru zo lo hle tih sawiin, thar chhuah leh thawn chhuah lama hmasawnna a awm theih nan training chu buatsaih a nih thu a sawi a. Pangpar chingtu kal khawmte chu an thil zirte ṭangkai taka hman tum tur leh rilru thar nena ṭan la zel turin a chah.
Pangpar chingtute tana training buatsaihah hian resource person pahnih awmin, Horticulture Department-a Deputy Director Dr H. Vanlaldiki chuan pangpar chin dan leh a par lak hnua enkawl zui dan (Cultivation Practices & Post Harvest Management of Cut Flowers) leh ei chhetu leh natna laka a him theih nana pangpar enkawl dan (Pest & Disease Management) a zirtir a. ZAGS General Secretary Pi Ida Malsawmzuali chuan pangpar hralh tur tel/fun dan leh a zawrh chhuah dan (Packaging & Marketing of Cut Flower) a zirtir bawk a. Zawhna leh chhanna leh sawi hona hun hman a ni bawk.
Lungleia pangpar chingtute puala training buatsaihah hian Lunglei khawpui chhung veng hrang hrang aṭangin pangpar chingtu mi 50 chuang an kal khawm a. Lunglei ADHO Dr Rosangpuii Pachuau chuan lawm thu sawiin hun a khar.
