Tourism minister-in phuaibuangah tlaizawng paradise kharna hun a hmanpui
Nizan khan Phuaibuang Field-ah Tourism department hmalakna a buatsaih, ni hnih awh ‘Tlaizawng Paradise’ kharna hun chu Pu Lalnghinglova Hmar, Minister, Tourism department chuan a hmanpui a, Pu Lalbiakzama, Speaker, Mizoram Legislative Assembly chuan a tawiawm. Tourism Minister Pu Lalnghinglova Hmar chuan Mizoram chu leilung mawina leh hausakna tam tak nei a nih thu leh khaw hrang hrang pawhin mawina leh hausakna danglam bikna an neih thu a sawi a. Phuaibuang khua chu pangpar mawi tak, Tlaizawng parna hmunpui a nih thu tarlangin, zinmite hip nan heng hausaknate hi hman tangkai a pawimawh thu a sawi.
Tourism Minister chuan Tlaizawng Paradise chu Tlaizawng par vul nasat hunlai berah buatsaih a nih theih nan ruahmanna siam a nih thu sawiin kum 2026 December thla a buatsaih leh tum a nih bakah nghakuai chiah runpui pawh huapzau zawka buatsaih a nih tur thu a sawi. Pu Tetea Hmar chuan ram leilung hausakna a hlut lehzual nan, a chhunga cheng ten kan ram leilung hausakna hlut a, kan humhalh thiam a pawimawh thu a sawi a. Zinmite hip tura a phochhuah leh puanzar hna pawh a chhunga chengte kutah thui tak a innghah thu a sawiin, leilung hausakna hmanga zinmite hip luhna chuan khawtlang tih hmasawnna a thlen thei thu a sawi bawk a ni.
Tourism department hmalakna a buatsaih Tlaizawng Paradise hi January ni 6 leh ni 7 hian hman niin, Tuivai luia nghakuai runpuite, Phuaibuang khaw chhevela tlang, puk leh lui dung tlawh chhuahna hunte buatsaih a ni a. Phuaibuang leh a chhevel khua mipuite thil siamchhuah phochhuahna hmunte buatsaih a ni. He huna tarlan danin Phuaibuangah hian Tlaizawng Paradise chhimtu khualzin mi sang khat chuang ziahluh a ni.
