UD&PA Secretary-i’n Leivung paihna hawng
Tukin khan UD&PA Secretary Pu Lalmalsawma Pachuau-i’n Aizawl Smart City Limited (ASCL) project pakhat-Soil Dumping Ground chu Khatla High School vengah a hawng a, he hmun hi insak leh lei laih atanga leivung paihna tur bika duan a ni.
Technical Report petu Pu V. Lalruatliana, Deputy CEO, ASCL-i’n a tarlan danin he Project hna thawktu hi M/s LHM Infra, Lawipu a ni a, project cost hi cheng nuai 103.16 niin hna hi October ni 6, 2023 ah tan a ni a, December ni 15, 2025 ah thawh zawh a ni. Soil dumping ground ah hian lirthei leivung paih tawlh thla palh tur ven nan gabion retaining wall sak a ni a, a san zawng hi meter 3 niin a hlai zawng hi meter 7 a ni. Hei bakah hian he ban hian leivung tling khawm te chu nghet takin a dawm thei dawn a ni. He leivung paihna hmun hian pickup lirthei trip 12,000 a dawl thei ang a, chu chu cubic meter 18,000 vel bawr a ni. He hmun hi leivung mai bakah insak thiahna thil hrang hrang (construction waste) paih theihna tura duan a ni a. A bulhnai lawka tuihawk luankawr chu a khuhna (drain cover) hmanga khuh niin hei hi meter 151 laia sei a ni. Hei hian ruahtui leh tuihawk him takin leivung paihna hmun tibuai lo leh tichhe lo turin a luan tir thei dawn a ni.
Khuallian Pu Lalmalsawma Pachuau chuan thu sawiin Aizawl khawpui atana faina chungchanga Comprehensive Plan kalpui mekah leivung paihna hmun hmung hrang hranga din hi ‘vision’ pakhatah a tel thu a sawi a. Hemi Plan leh vision hlawhtlinna pakhat Aizawl Smart City Limited kaltlanga kan nei thei hi a lawmawm a tih thu a sawi a. Khatla vengah hian hmalakna hrang hrang a kal chho mek a, UD&PA leh Department hrang hrang te hmalaknaah Khatla YMA leh Local Council te chu theihtawpa tawiawm leh thlawp zel turin a ngen a. Khatla YMA te chuan thalaite insawizawina hmun tur sport facility an din dawn a. Khuallian chuan hemi chungchangah leh he leivung paihna hmun din thar enkawl zui zelna tur atan hian duhsakna a hlan nghal bawk.
