NIT Mizoram leh IIT Madras zirtirtu leh zirlaiten Prof. Lalnilawma kawm
Vawiin khan National Institute of Technology (NIT) Mizoram leh Indian Institute of Technology (IIT) Madras a thawk zirtirtu leh zirlaiten RD&A Minister Prof. Lalnilawma chu a pisaah an kawm. IIT Madras leh NIT Mizoram tangkawp hian Mahatma Gandhi pianchamphaphak vawi 150-na hriatrengna atan leh Prime Minister Pu Narendra Modi-a’n a ngaih pawimawh em em New India Mission zulzuiin New India Internship (pilot) an duang chhuak a, he’ng zirna in pahniha zirlaite hian Mizoramah December ni 16, 2025 atanga January ni 10, 2026 thlengin New India Internship hi an kalpui dawn a ni.
He internship programin a tum ber chu Mizoram chhunga thingtlang khuate harsatna leh mamawh hrang hrangte hriatchhuah leh tunlai thiamna (technology thar ber ber) hmanga chung harsatnate sutkian a ni a. Intern-te leh he institution pahnih a zirlaiten field research-te neiin technology hmanga harsatna sutkian dan tur kawng an zir dawn a ni. Internship team-ah hian IIT Madras atangin student 11 leh faculty member 3 an tel a, NIT Mizoram atangin faculty member 3 leh zirlai 21 an tel dawn a.
Prof. Lalnilawma chuan National Institute of Technology (NIT) Mizoram leh Indian Institute of Technology (IIT) Madras ten remhre taka thawhho an tum chu lawmawm a tih thu a sawi a, rampum huap pawha zirna in tha leh chhuanawm ten Zoram thingtlang khuate hmasawnna tur tunlai thiamna thar ber ber hmanga an zirchiang tur chuan rah tha tak a chhuah beiseiin duhsakna a hlan a ni. RD&A Minister hi Pu V. Lalengmawia Additional Secretary, RD&A, Pu K. Lalrohlua Director, RD&A, Pu Laltanpuia Hnamte, Jt Secretary, RD&A, Pi Zosangzuali Pachuau, CEO, MzSRLM leh RD&A Department Official te’n an tawiawm a ni.
