Sports Minister Pu Lalnghinglova Hmar in Mizoram Cricket Team te Syed Mushtaq Ali Trophy Plate 2025 champion lawmpuina hun hmanpui
Vawiin khan Hotel Floria Rooftop ah Mizoram Cricket Team te champion lawmna neih a ni a, Sports & Youth Services Minister, Pu Lalnghinglova Hmar in he hun hi a hmanpui a ni. Champion lawmna hun hi Cricket Association of Mizoram (CAM) buatsaih niin, Pu Lalnghinglova Hmar chu khuallian a ni a, ani bakah hian Pu Robert Lalfamkima, (President, CAM) chuan thu a sawi a bawk. Report hi Manager, Senior Men’s Team leh Under-23 Team Manager te’n an pe a. Pu Lalfakawma Varte (Secretary, CAM) in inhmelhriattirna neiin, Pu Lalrothuama’n Hunserh a hmang a, Pu R. Lalnunsiama’n (Treasurer, CAM) lawmthu sawina hun a hmang a ni.
Pu Lalnghinglova Hmar chuan Mizoram Cricket Team te hlawhtlinna chu lawmawm a tih thu a sawi a. Players te chu an thlen chin a duhtawk mai lovin, sang tak thlen tum turin a chah a. Amah ngei pawhin tun hmaa Cricket a khelh thin lai te sawiin, tun hnua Mizorama Cricket in hma a sawn zia te a sawi a, players te chu tih tak takna nena khel tura fuihin, cricket ah eizawnna tlak a awm thu a sawi. Inkhelmite chu an chhungkua, khawtlang leh kohhran leh Mizoram te theihnghilh mai lova, malsawmna pe lettu ni fo turin a chah bawk.
Syed Mushtaq Ali Trophy hi India ram T20 cricket competition, Board of Control for Cricket in India (BCCI) buatsaih a ni a, 2025-26 inelnaah hian team 38 telin, Elite Groups (32 teams) leh Plate Groups (6 teams) ah te then an ni. Plate Group bikah hian cricket lama region hnufual deuh a mi Team Paruk (6) te an tel a, vawikhat theuh intum kualin a sang ber pahnih, Sikkim leh Mizoram te’n Final an lut a. Pune a Final an khelh ah Mizoram in Sikkim chu run 10 a hnehin, an champion ta a ni. Plate Champion te hian season lehah Elite section an khel thei dawn a, Elite Group a rank hniam ber aiin an khel dawn a ni.
