Ud&pa minister-in aizawl sumtual, mineco a hawng

3 months ago Sonakshi Sarkar

Vawiin chawhnu khan Pu K. Sapdanga, Minister, Urban Development & Poverty Alleviation (UD&PA) chuan Aizawl Smart City Ltd. (ASCL) hmalaknaa din ‘Aizawl Sumtual’, MINECO hmun ami chu a hawng a. He hawnna inkhawm hi Pu Lalmalsawma Pachuau, Secretary, UD&PA chuan a kaihruai a ni.

Minister Pu K. Sapdanga chuan he hunah hian thusawiin mipuite tana lenthawvenna hmun nuam tak ‘Aizawl Sumtual’ sak zawh a ni chu lawmawm a tih thu leh hetiang hmun ngaihtuahchhuaka, a taka chan tirtu ASCL-te thawhrimna chu fakawm a tih thu a sawi a. Minister chuan kan pi leh pute duhthusam sang ber chu pialrala faisa rin a nih ang khan tunlai thangtharte tan Aizawl Sumtual faisa rin chu thil nuam leh hlimawm tak a nih tur thu a sawi a ni.

Vawiin ‘Aizawl Sumtual’ hawnna inkhawmah hian Pu CC. Lalchhuangkima, CEO, ASCL hnen atangin technical report ngaihthlak a ni a. A hmun enkawlzuitu tur Mizoram Handloom Industry neitu Pi Lalthazuali hnenah he hunah hian kum 2 chhung atan agreement hlan nghal a ni a. Pu Lalrohlua, Joint Secretary, GAD chuan lawmthu sawiin hun a khar a ni.

Aizawl Sumtual hi Rs. 10,12,65,060 senga sak niin, hna thawktu (contractor) atan M/S Mizoram Development Agency rawih an ni a, September 5, 2023 khan an thawk tan a, November 30, 2025 khan zawh fel a ni. He hmun enkawlzui tur hian open tender chhang sang ber Mizoram Handloom Industry, Tanhril Vengpui thlan an ni a, thla tin Rs.3,55,555 ASCL-ah an chhunglut dawn a. Mipui tan December 15 atangin tlawh theih a ni dawn a ni.