Chief minister-in institute of chin affairs (ica) frienship dinner – together for humanity a telpui
Vawiin khan Institute of Chin Affairs (ICA) ten Aijal Club-a “Together for Humanity” Friendship Dinner an buatsaih chu Chief Minister Pu Lalduhoma’n a telpui. Zanriah kilho hmain inkawmhona neih hmasak a ni a. He hunah hian thusawiin Chief Minister chuan, khawvel hmun hrang hranga cheng Chin mite din Institute of Chin Affairs (ICA) hnathawh hrang hrangte a ropui thin a. Chin mipui zawng zawngte tan malsawmna lo ni zel rawh u, a ti a. Friendship dinner pawhin rah tha a chhuah ngei a beisei thu a sawi. Pu Lalduhoma chuan, tun hnai Myanmar buai tirh phat atang khan Zofate Jerusalem, Mizoram a chengte chuan kan unau, sa himna zawnga rawn raltlante buaipui reng rengin hun kan lo hmang a. NGO leh Mizoram sawrkarin a theih ang angin kan lo dawngsawng thin a ni.
Kan inkuangkuah theihna ban chu sei lua lo mah se, kan theih tawk kan chhuah tih hi min hriat sakin kan ring a. Kan theih tawp hi kan la chhuah zel dawn a, kan tan ho tlat chuan lungngaihna tur a awm lova ni. Vawiina kan harsatna tawh mekte tha taka kan hmachhawn theih nan Chin state chhunga zofate inlungruala, zai khata luangza turin ka ngen a. Kan inlungrual loh chuan midang tan hneh awlsam tak kan ni reng dawn a ni. Thukhat vuain, inkaihhruaina pakhat hnuaiah, tum thuhmun neiin awm ang u. Vawiina dinner pawh hian chu chu a thiltum a ni. Tin, tupawhin India sorkar zah takin thil ti zel ang che u, tiin a chah. Pi Lalrinpuii, Health Minister pawhin thu sawiin, raltlan lo lutte hriselna sorkarin a theih ang anga a lo buaipui dan a tarlang a. Prof. Lalnilawma, Minister, PHE pawhin thu a sawi bawk.
Inkawm khawmna hi Dr. B. Lalzarliana’n a kaihruai a, Pu Salai Van Sui San, Information Officer, ICA chuan Institute of Chin Affairs dinchhan leh a thiltumte, a hmalak tawhnate sawifiahna a nei a. An pawl hian Chin Hills buaina tuartu mipuite hriselna leh zirnate buaipuiin mite a tanpui thin a, lungrual taka an kal theih nan hma a la thin bawk.
