DHOLAI, ASSAM-AH ASSAM-MIZORAM BORDER FESTIVAL 2025 ROPUI TAKA HMAN A NI
Vawiin khan Central Field; CDC Dholai Office Ground, Dholai, Assam-ah ‘Assam-Mizoram Border Festival 2025’ (Border Festival vawi 2-na) chu ropui taka hman a ni a. He hunah hian Mizoram atangin Kolasib Bawrhsap Pu Robert C. Lalhmangaiha leh SP, Pu Lalrinpuia Varte te, Pi B Malsawmtluangi Addl DC Kolasib te, Pu Lalmuan Puia, PD( DRDO), Pu H VanLalbiakzauva SDO(civil) Vairengte leh Kawrthah SDO(civil) te an tel a; Assam lam atangin Parimal Suklabadya MP Silchar, Nihar Ranjan Das, MLA Dholai leh Cachar DC Mridul Yadav IAS te leh official pawimawh tak takte bakah mipui thahnem tak an kalkhawm a ni.He hunah hian Pu Nihar Ranjan Das, MLA Dholai chuan inlawmna thu sawiin, Border Festival hman a ni thei chu lawmawm a tih thu a sawi a. He hun hian state pahnih inkarah rah tha a chhuah ngei a beisei tih sawiin, Cultural lama inzawmna chuan rilruah hmun a luah nghet em em a; chuvangin, cultural exchange te neih chhunzawm zel a, Assam leh Mizoram mipuite inkarah inlungrualna thlen turin theihtawp chhuah zui zel a pawimawh a ni, a ti.
Pu Parimal Suklabadya, MP Silchar pawhin thu sawiin, India mi vek kan ni a, intibuai lova rilru hmunkhat pu a awm tlang tur kan ni, a ti a. Official-te rilru khat pua an lo kalkhawm chu lawmawm a tih thu sawiin, Assam leh Mizoram inkara buaina te leh thil lo thleng tawh te kalsan a, hmalam pan a ngai a ni, a ti. India ram chu a ropui zual zel a, khawvela economy lianah palina kan ni mek a; Bharatmala project pawh kal zelin 4-lane kawng tha tak a kal chho dawn a, helai chhehvel te pawh a lo changkan chhoh zel bakah kan inkarah pawh inpawhtawnna tha zawk leh inzawmna tha a thlen phah ngei a rinawm a ni, a ti bawk. Kolasib Bawrhsap Pu Robert C. Lalhmangaiha pawhin thu sawiin, Mizoram leh Assam inkar thu chu a chhe tur a ni lo, a ti a. Hun kal tawha thil duhawm lo thleng ang kha a thlen tawh loh nan thawhhona tha leh inpawhna tha zawk an neih angai a ni tiin, India ram ropui tak a cheng za an nih anga inngeih taka kan awm tlan dial dial a pawimawh takzet a ni, a ti.
Pu Mridul Yadav IAS, Cachar DC pawhin thu sawiin, vawiina lo kalte chuan memory tha tak an hawn a beisei thu leh vawiina programme chuan Mizoram leh Assam inkara inpawhna tha zawk a thlen phah ngei a beisei thu a sawi a . Assam atanga kalkhawmte chu hnam hrang hrang atanga kalkhawm an nih thu pawh sawiin vawiin a cultural hun an hmang ho thei chu a ropui takzet a ni, a ti.Thusawina hun hman zawh hian state pahnih atangin hnam lam- Cultural Dance entirna hun an hmang a Mizoram aiawh in Vairengte, Mamit leh Kawrthah cultural troupe ten hnam lam hi an entir a ni. Cultural programme zawh hian Assam leh Mizoram ASRLM leh MZSRLM ten cultural leh food stall hrang hrang an siamte enho a ni a, chawhnu lamah football leh volleyball-a infiamna hun hman chhunzawm a ni. Vawiina he hun hmannaah hian Mizoram atangin Official te bakah Sub Hqrs YMA Kolasib aiawhte, MJA Kolasib District aiawhte leh Vairengte leh Mamit atangin cultural group-te an tel bawk a ni.
