MIZORAM SAWHTHING THARCHHUAH CHUNGCHANG INRAWNKHAWMNA NEW DELHI-AH BUATSAIH (STAKEHOLDER CONSULTATION FOR MIZORAM GINGER)
Vawiin khan Mizoram sorkar leh NITI Aayog, Government of India tangkawp chuan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu Vigyan Bhawan, New Delhi-ah an buatsaih a, Chief Minister Pu Lalduhoma chuan a telpui.He inrawnkhawmna hi Chief Minister, Council of Ministers leh NITI Aayog te nena duan chhuah a ni a, a thil tum ber chu Mizorama kuthnathawktute tharchhuah sawhthing lei leh hralh kawnga harsatna sut kian dan tur sawihona leh market tha zawk, loneituten an hlawk pui lehzual tur dapchhuah tumna a ni. Hetiang inrawnkhawmna neih vawikhatna nia hriat a ni.Mizoram chhunga sawhthing sawngbawlna tha zawk neih leh India ram chhung leh khawvel hmun zau zawka sawhthing thawnchhuah dan tur te an sawi a. Kuthnathawktu pawl (FPOs), Industry leh sumdawng (entrepreneur) te tana kalphung tha zawk leh sawhthing chin leh hralh kawnga Strategic Action Plan te pawh an sawi a ni.
He meetingah hian Chief Minister chuan, Mizoram chu tun hnai kum hnih vel chhungin India rama sawhthing tharchhuak tam ber pawlah a inhlangkai a. Mizoram tharchhuahte hi hmun danga mite aiin a quality pawh a sang deuh zawka hriat a ni. Sawhthing chingtute tan Mizoram sorkar chuan kg khat zelah Support Price Rs. 50 a pe mek a. Kuthnathawktute tanpui duhna thinlung pu, hlawhtlin ngei tum sumdawng (investor) te chu Mizoram sorkarin lawm takin a thawhpuiin a dawngsawng thei reng a ni, a ti. Chief Minister hian investor-te tana hmalak awlsam tur zawnga sawrkarin industry leh investment policy a siamthat tawh thu a tarlang bawk. Sawhthing mai ni lo, thlai thar dang lei leh sawngbawl kawngah pawh Mizoram sorkar chu Investor-te tan kan inhawng hle a. Vawiina min rawn telpuitu Investors te hi thla thar, ni 5-6 December 2025 a Aizawla neih tur, sawhthing Buyer-Seller Meet-a rawn tel vek turin ka sawm che u a ni, tiin Investor te chu Buyer-Seller Meet chhim turin a sawm nghal a ni. Chief Minister hian inrawnkhawmna hlawhtling tak a awm theih nana hmalakpuitu Dr. VK Paul, Member, NITI Aayog leh NITI Aayog a thawktute chungah lawmthu a sawi bawk.
Inrawnkhawman hi hun chhawng thuma kalpui a ni a, a chhawng khatna hi a hawnna inkhawm niin Dr. VK Paul, Member, NITI Aayog chuan a kaihruai a. Pi Ramdinliani, Special Secretary, Agriculture and Farmers Welfare chuan Mizoram Sawrkar aiawhin presentation a nei a. A chhawng hnihnaah he huna tel Industry, FPO leh Academia-te nen Mizorama sawhthing tharchhuah hralhna leh sawngbawl zui kawnga hmasawnna tur leh insumdawn tawnna tur te sawiho a ni. A chhawng thumnaah Mizoram leh central sawrkara mi pawimawh tak tak – Rohit Kumar, Addl Secretary, NITI Aayog, Abhishek Dev, Chairman, APEDA, AP Das Joshi, Secretary, Ministry of Food Processing Industries, Vaidya Rajesh Kotecha, Secretary, Ministry of Ayush, Devesh Chaturvedi, Secretary, Ministry of Agriculture and Farmers Welfare, Pu Lalnghinglova Hmar, Minister, LESDE leh Khilli Ram Meena, Chief Secretary ten thu an sawi thung. Inrawnkhawmnaah hian sawrkar hotute lehIindustry aiawh mi 60 chuang an tel a ni. NITI Aayog-in rawtna an siam danin Mizoram chu Ginger capital of India tih ni se, sawhthingte chu organic a nih zel theih nan hmalak zui zel ni se, technology sang zawk nena a processing lam kalpui dan kawng zawn ni se, India ram chhung chauh ni lovin ram pawna thawn chhuah kawngah pawh hmalak ni se, an ti a. An rawtnate chu chak taka bawhzui zel turin thutlukna an siam a ni.
