Akashvani lunglei 30th anniversary ropui taka lawm a ni
Akashvani Director leh Mizoram Cluster Head Pu DR Lalropuia’n tunlai thiamna hmanga hmasawnna tam tak awm karah Radio chu mipui thinlungah ngaih pawimawh leh hlut ala hlawh reng a ti. He thu hi vawiina Akashvani Lunglei kum 30 tlin champhaphak a hmanpui na ah sawiin Station Director chuan mipui thinlungah Radio chu hlut ala hlawh reng a ti a, Akashvani thawktute chu tunlai khawvela hmasawnna hrang hrang hmang thiam a, Digital khawvela social media te chu hman tangkai thiam a pawimawh tih sawiin thawktute hmasawn tuma ṭan lak a pawimawh tih a sawi. Mizoram Cluster Head Pu DR Lalropuia chuan Akashvani Lunglei ah hmasawnna a awm zel tih sawiin khawl ṭha tak tak hmanga thuam chak zel a ni a ti a, Akashvani Lunglei chu Mizorama FM Broadcasting Station hmasa ber a ni a ti a, FM dinchhuahna anih avangin Mizorama Radio FM hlutna chawi nungtu an ni a ti bawk.
Asst Director (Program) Pu Biakchungnunga pawhin thusawiin Lunglei mipui mai bakah chhim lamah Akashvani Lunglei chuan hlut ala hlawh hle a ti a, Social media lamah hmarchhak station hrang hrang zingah mipui ngaihhlut ber a ni mek a ti a, Akashvani program chu hnam ziarang pholanna pawimawh tak ani tih sawiin mipui rin an hlawh zel theih nan theihtawp chhuah chhunzawm turin thawktute a chah a, Radio chu mi tin thleng phak anih avangin tunlai hmasawnna awm chu hmang thiam a, thawhhona ṭha tak nena chhunzawm zel turin a chah bawk.
Kum 1995-a din Akashvani Lunglei kum 30 tlin champhaphak lawmna ah hian Akashvani Aizawl atangin thawktu mi 20 chuang he hun chhim tur hian an kal a, Field Station hrang hrang Champhai, Kolasib, Tuipang leh Saiha atangin an tel a, Akashvani Lunglei ah hian tun dinhmunah Regular staff 9 leh Technical Assistant 3 bakah Casual Asignee 49 an awm mek a ni.
