8th Rashtrya Poshan Maah 2025 a ‘Best Performing District’ nih lawmna Siaha-ah neih a ni
Vawiin chawhnu dar 3 khan MADC Golden Jubilee Hall, MADC Complex Siaha-ah Siaha District in Poshan Abhiyaan hnuaia 8th Rashtrya Poshan Maah 2025 a ‘Best Performing District’ lawmman an dawn lawmna chu Women and Child Development, Siaha buatsaihin neih a ni. He hunah hian Pi Hepaw Hlychho, CDPO, Women and Child Development chuan lawmthu sawiin, Pu M. Laikaw, Chief Executive Member, MADC chuan thu sawina neiin Mizoram pumah Nu leh Naupang hriselna kawnga Siaha in Best Performing District award a dawng thei chu a lawmawm takzet a, CDPO leh a staff te thawhhona leh an thawhrimna rah a nih thu a sawi. Women and Child Development hnuaia thawktute chu tan la zual sauh sauh turin a fuih bawk.
Siaha District Bawrhsap Pu VL Hruaizela Khiangte pawhin thusawina neiin, Mizoram pumpuia a pakhatna nih chu thil awlsam a nilova, tehna hrang hrang paltlang a ngai a, vawiina Siaha district in pakhatna lawmman a dawng thei chu mipuite nen thawhhona tha tak an neih zia a ti lang chiang hle a ni a ti. Department hrang hrangte chu Hmalakna tha nei tura in hrilhhriat tawna tanho a pawimawh thu a sawi bawk a ni.
He hunah hian Pu M. Laikaw CEM, MADC leh Pu VL. Hruaizela Khiangte, Deputy Commissioner, Siaha te chuan Darkhuangte vuain ropui taka lawm a ni a, Programme hi thuang hnih a then niin 2nd session-ah Maraland Rock Society (MRS) hovin Concert neih a ni bawk a ni.
