UCO Bank in AMC ah chhiatrupna thlen thulha tanpuina tur an hlan
Nimin khan Aizawl Municipal Corporation chuan UCO Bank Corporate Social Responsibility (CSR) atangin chhiatna thlen thulha hman tur Emergency Response Vehicle a dawng. UCO Bank hian ERV atan hian Mahindra Bolero Camper leh a body siam danglamna tur sum leh hmanrua (equipment) thahnem tak cheng nuai 15 man hu AMC a hlan a ni. Emergency Response Vehicle inhlanna hun hi Mayor Office Chamber-ah neih a ni a. AMC aiawhin Pu Lalrinenga Sailo, Aizawl Mayor in thilpek hi a dawng a, Pu R. Thanglura, Deputy Mayor, Pu Lalringliana, Executive Corporator, Pu Lalremruata Kullai, Joint Municipal Commissioner leh officer dang ten an tawiawm a. UCO Bank aiawhin Pu. Alok, DGM, Head Office, Kolkata, Pu Sanjeev Roy, AGM, Zonal Head, Agartala Zone; Pu Gautam Das, Chief Manager, Aizawl Branch leh Pu Chin Zapau Ngaihte, Manager, Thuampui Branch ten thilpek hi an hlan a ni.
Pu Lalrinenga Sailo, Aizawl Mayor chuan AMC hmalakna te a hlawhtlinna tura UCO Bank-in Motor leh hmanrua tha tak tak AMC an pe chu a lawm thu sawi a, Aizawl mipui tan tangkai taka hman a nih dawn thu a sawi a, UCO Bank nen thawhhona tha tak an nei chu a lawm thu a sawi a ni.AMC Board of Corporators meeting-in Emergency Responsive Team din tura a lo pawm tawh angin AMC chu Aizawl khawpuiah chhiatna hrang hrang a thlenin AMC hminga a tul anga thawk chhuak thei turin hma a la mek a. Disaster Response Squad nei ve tura hma lain Zotrek te nen thawh hona a siam tawh bawk.
UCO Bank, hi India rama public sector bank 12 zinga pakhat niin, an headquarters hi Kolkata a ni a, Zonal Office 43 neiin Branch 3000 chuang an nei a. India ram mai bakah Singapore leh Hongkong ah te an inzarpharh a ni. UCO Bank hi 1970 khan Mizoramah office an din tan a, Branch 3 neiin – Dawrpui Veng, Aizawl, Thuampui Veng (AMC Office Opposite) , Aizawl leh Vairengteah te an hawng a ni. Home loan, Car loan, Education loan leh Retail leh Agriculture loans hrang hrang te interest rate tha takin an pe chhuak thin a, instant digital loan pawh ₹25 lakh thleng an pechhuak thei a, fixed deposite pawh interest tha takin an an kalpui mek a ni.
