Champhaiah Mizoram State Anti-Tobacco Day vawi 12-na pualin Tobacco Free Youth Campaign 3.0 hawng
Vawiin khan I&PR Conference Hall-ah District Tobacco Control Cell, Champhai (DTCC) buatsaihin Mizoram State Anti-Tobacco Day vawi 12-na pualin Tobacco Free Youth Campaign 3.0 hawn a ni a, Champhai Bawrhsap Pu Mohammad Aaquib chuan khuallian niin a hawng a ni. Khuallian Pu Mohammad Aaquib chuan zirlai kalkhawmte zuk leh hmuam laka fihlim hram turin a fuih a, India ramah Mizoram chu zuk leh hmuam ti hnem ber leh cancer vei tamna ber an nih thu sawiin he nihna thlak tur chuan zuk leh hmuam tih loh a ngai tih a sawi.
Zuk leh hmuam lo ti tawh an awm a nih chuan bansan turin a fuih a, ti lo te chu ti chhin lo hram turin a fuih bawk. Mizorama zuk leh hmuam lama danglamna siamtu ni ngei turin duhsakna a hlan a, Tobacco Free Youth Campaign 3.0 chu a hawng a ni. He hun hi Dy. Chief Medical Officer Dr. Lalramhluna’n a kaihruai a, DTCC Consultant Pu Zosangzela’n Anti-Tobacco chungchang te, DTCC hmalakna chungchang leh zuk leh hmuam tihtlem nana hmalakna hrang hrang a sawi. Govt. Champhai College Asst.
Professor Pu Lalthamawia Bawlchhim chuan Tobacco Free Youth Campaign 3.0 chungchang, a thil tum leh kalpui dan tur te a sawi a, District Anti-Tobacco Squad Sr. Member Prof. Lalnunmawia’n lawmthu sawiin hun a khar a ni. He hunah hian GM High School zirlai thahnem tak an tel a ni. Tobacco Free Youth Campaign 3.0 hi zirna in zuk leh hmuam awm lova siam tumna a ni a, zirlai te, thalai te zuk leh hmuam thatlohna zirtirna rim taka kalpui tum bawk a ni.
