Siaha-ah 20th Battalion Assam Rifles ten Mizoram Territorial Army lak tur chungchangah MJA leh NGO te kawm
Vawiin khan 20th Battalion Assam Rifles te chuan Assam Rifle camp, Siaha-ah MJA member te leh NGO te chu Mizoram Territorial Army lak tur chungchangah inkawmhona an neih pui. Company Commander Major Sukhraj Singh chuan territorial army lak thar tur chu a tha hle a, Indian Army dang angin ramchhung hmun hrang hrangah post an ni dawn lova, Mizoram chhungah chauh post an nih tur thu a sawi.
Hei bakah hian Indian army ten hamthatna a dawn tur ang a dawn vek dawn thu a sawi bawk. Siaha District atanga tel duhte tan Aizawl Rajiv Gandhi Stadium-ah recruitment neih a ni dawn a, Siaha district atanga tel duhte tan pre training pek bakah exam inpuahchahna tan class pek an inhuam thu a sawi bawk a ni.
November ni 15 atanga November ni 25,2025 thleng Territorial Army lak runpui hi Rajiv Gandhi Stadium, Aizawlah neih a ni dawn a. November ni 22-23 chhungin hmeichhe tan bik buatsaih a ni dawn a, hei bakah hian 24-25 November chhungin Nu emaw Pa emaw India Sipaia tang duh te tan buatsaih a ni dawn bawk a ni.
