Tlawng lui kalpui dan tura inrawnkhawmna hun chu chief minister-in a hmanpui
Vawiin chawhnu khan Planning & Programme Implementation Department Conference Hall-ah Irrigation & Water Resources Department bultuma Tlawng lui humhalhna leh tui hna tih chak lehzualna tur,’ ‘REVITALISING TLAWNG RIVER THROUGH SPRINGSHED MANAGEMENT & ALLIED STRATEGIES’ kalpui dan tur chungchanga inrawnkhawmna neih a ni a. Pu Lalduhoma, Chief Minister chuan he hun hi hmanpuiin Dr. Ranbir Singh, Chairman, Brahmaputra Board chuan thupui sawi hawnna hun a hmang a. Er. Lalrothanga, Secretary, Irrigation & Water Resources Department chuan hun a kaihruai a ni. He hunah hian Public Health Engineering Department, Irrigation & Water Resources Department leh IIT Roorkee buatsaih, Powerpoint Presentation-te en ho a ni.
Mizoram Chief Minister Pu Lalduhoma chuan Mizoram leilung hausakna humhalhna tur leh kan lui tlan ber, Tlawng lui humhalh leh tui hna tihchakna tura Irrigation & Water Resources Department hmalakna chu fakawm a tih thu a sawi a. Inrawnkhawmna hlawhtling tak a nih theihna tura hemi kawnga thiamna leh tawnhriat tha tak tak nei, Brahmaputra Board-te, IIT Roorkee leh Public Health Engineering Department-te an tel chu lawmawm a tih thu sawiin Brahmaputra Board-in Aizawlah 86th Annual Meeting hlawhtling taka an buatsaih chu a lawmpui thu a sawi bawk a ni.
Pu Lalduhoma chuan Brahmaputra Board leh IIT Roorkee-te nen Mizoram Sawrkar chuan thawhhona tha tak a kalpui mek thu sawiin, Mat lui zirchianna, nungchate humhalhna, lui dunga eizawnna siam leh lui dung inkalpawhna tha siamna turin ‘Mat Valley Integrated Water Resource Management and Climate-Resilient Irrigation Project’ kalpui mek a nih thu a tarlang a. Kan lui luan dan leh an dinhmun dik tak hriat theihna turin ‘State Water Informatics Centre’ pawh a taka kalpui mek a nih thu a sawi bawk a ni.
Chief Minister chuan tui hna leh lui humhalh kawngah hmalakna hrang hrang awm thin mahse, khawpui thang zel avanga kan tui mamawhna a pun zel avangte, ram ngaw thiah avangte leh sik leh sa inthlak danglam nasa avangtein Tlawng lui pawh nasa takin a nghawng mek thu a sawi a. IWRD, Brahmaputra Board, PHED leh IIT, Roorkee tangkawp ruahmanna hian Tlawng lui leh a fintu lui te zawk humhalhna huang zau zawka kalpuina tur a nih angin, Tlawng lui leh a chhunga cheng nungchate humhalhna leh hmasawnna inbuktawk thlen tirna kawngah hmasawnna nasa zawk a thlen ngei a beisei thu a sawi a. Mizoram Sawrkar chuan hemi kawnga hmalakna chak zawka kalpui a nih theih nan ‘Mizoram (Protection of Rivers) Act, 2023’ chu a lo pawm tawh tih a sawi.
Pu Lalduhoma chuan leilung hausakna, a bik takin tui chu hausakna intawm a nih thu tarlangin, Tlawng lui humhalhna leh a chawmtu tui hna tihchakna chuan kan thenawm state chawmtu pawimawh tak, Barak River Basin-te pawh a tha zawngin a nghawng zel dawn, tih a sawi a. Brahmaputra Board, India–EU Water Partnership leh KfW (Germany) tangkawpin Barak River Basin Management Plan an kalpui hian thawhhona leh tanrualna neih a pawimawh zia a tihchian thu sawiin, Tlawng leh Mat River Project tih hlawhtlinna tur hian kalkhawmte chu thawhhopui ah a sawi a. Tui thianghlim hnianghnar tak Mizoramin a neih theih nan he hmalakna thuthlungah I-pathum; Integration, Innovation leh Involvement tih chu hman a nih tur thu a sawi.
Vawiin Tlawng lui humhalhna tura inrawnkhawmna hunah hian Sawrkar Department hrang hrangte bakah MZU, CYMA, Save the Riparian, Centre for Environment & Social Justice, Project Save Tlawng aiawhte an tel a. ‘Dependence of Aizawl and Lunglei on River Tlawng for Drinking Water Supply’ tih thupui hmangin Dr. F.Lalbiakmawia, Asst. Hydrogeologist chuan Presentation a pe a, Irrigation & Water Resources Department atangin ‘Initiatives taken up on Springshed management for Water Security’ tih thupui hmangin Presentation an pe a, IIT Roorkee atangin ‘Rivitalising Tlawng River through Springshed Management & Allied Strategies’ tih thupui hmangin presentation an pe bawk a ni.
