Sports Minister Pu Lalnghinglova Hmar in Aizawl International Half Marathon 2026 a tel turin India mi zawng zawng sawm Prize pool Rs. 20 lakh aia tlem lo a ni dawn
Vawiin chawhnu khan Pu Lalnghinglova, Minister of State, Sports & Youth Services Department hovin Vasant Vihar, New Delhi-a Mizoram House-ah Aizawl International Half Marathon (AIHM) 2026 chungchang khuhhawnna Press Conference neih a ni. Sports Minister chuan AIHM 2026 chu February ni 14 ah neih tur a nih thu leh, mi 5000 vel tel tura beisei a nih thu a puang. Press Conference-ah hian national media te an kal tha hle. Sports & Youth Services Department leh Innovations India tangkawpa buatsaih Aizawl International Half Marathon hi kumin April thlaah a vawikhat na’n hlawhtling takin neih a ni a, Mizoram chhung leh pawn atangin mi 1500 vel an tel. Sports Minister Pu Lalnghinglova Hmar chuan kum 2026 ah mi 5,000 tal tel tura ruahmanna siam a nih thu leh, a bikin state pawn atangin tam zawk tel tura beisei a nih thu a sawi a. India ram state hrang hrang atanga tel an tam theihna’n a khuhhawnna Press Conference pawh New Delhi-ah buatsaih a nih thu a tarlang a ni.
Pu Lalnghinglova Hmar chuan September 13, 2025 a Sairang thleng rel kawng hawngtu Prime Minister Pu Narendra Modi-chungah lawmthu sawiin, kawng hrang hrangah Mizoram leh state dangte inkungkaihna tha zawk a thlen ngei a beisei tih a sawi. “AIHM 2025 buatsaih laiin thlawhtheihna leh motor hmang chauhin Mizoram a kal theih a, chuti chungin lawmman latu chu state pawn atanga rawn kalte deuh vek an ni. Tunah chuan Sairang thleng rel a luh tawh avangin state pawn atangin mi tam zawk tel ngei turin kan inbuatsaih” a ti. Sports Minister chuan AIHM 2026 prize pool ah cheng nuai 20 aia tlem lo dah a nih thu a tarlang a. AIHM 2026 a tel piah lamah, Mizoram tlawh tur hrim hrima zin turin India ram chhung leh pawn mipuite a sawm a ni. Delhi-a Press mite kal tlanga India ram mipui zawng zawng Half Marathon-a tela Mizoram tlawh pah tura sawmin, “Mizoram a awm tih pawh hre lote hnenah Mizoram tihlar kan duh a, tunah chuan Aizawl khawpui hi rel-a awlsam taka tlawh theih a nih tawh avangin state pawn mi ṭhahnem zawk kan beisei a, chu chu New Delhi-a media hmaah hian kan puang duh a ni,” a ti.
Tourism Minister ni bawk Pu Lalnghinglova Hmar chuan Mizoram chu khualzin tlawh chakawm tak state a ni chungin kan inpho chhuah thiam loh vang te, inkalpawhna a harsat avang leh thlawhtheihna chuan man a to avangin tlawhtu an ṭhahnem tawk thei lo tih sawiin, “Tunah chuan rel kan nei a, Delhi, Kolkata leh Guwahati atangin awlsam taka kal zung zung a theih a ni,” tiin India state danga mipuite zin turin a sawm. Pu Rahul Bali, MD, Innovations India chuan Aizawl International Half Marathon chu ‘Athletics Federation of India’ pawmpui a ni tih sawiin, AIHM 2026 ah Half Marathon (21.1 km), Open Race (10 km), Fun Race (5 km) bakah Junior category leh Senior/Veteran category te telh belh a nih tur thu a sawi. He huna thusawitu Pu H. Lalhmingthanga, Director, Sports & Youth Services Department pawhin Mizorama zin ngei turin runner thate leh mipuite a sawm a, Department lam pawh phur taka an inbuatsaih chhoh mek thu a sawi.
