Larsap-in Mizorama kalpui turin Swasth Nari, Sashakt Parivar Abhiyan leh 8th Rastriya Poshan Maah Campaign a hawng
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Swasth Nari, Sashakt Parivar Abhiyan (Healthy Woman, Empowered Family) leh ‘8th Rastriya Poshan Maah (8th National Nutrition Month) Campaign hawnna hun, Mizoram Legislative Assembly Annexe Conference Hall-a neih chu hmanpuiin a hawng. He hun hi Health & Family Welfare Minister Pi Lalrinpuii chuan a telpui a ni. He hunah hian India ram puma Swasth Nari, Sashakt Parivar Abhiyan leh 8th Rastriya Poshan Maah Campaign kalpui tur, Prime Minister Pu Narendra Modi-a’n Dhar, Madhya Pradesh atanga a hawnna hun chu online kaltlanga chhim a ni a. Hemi hnu hian Mizoram puala campaign hawnna hun hman chhunzawm a ni.Larsap General (Dr) Vijay Kumar Singh chuan kum 2018-19 atanga Mizorama Ayushman Bharat kalpui a nih hnuah hriselna lama hmasawnna tam tak hmuh a nih thu leh, inenkawlna tha leh tlawm, hnaivai bawk si hmanga bultan a nih thu sawiin, Medical College, District Hospital, PHC, CHC, UPHC, Health & Welness Centre leh Sub-Centre-te kaltlangin health facility-te hnuh hnai a nih thu leh mipui tan awlsamna siam a nih thu a sawi a. Mipui hmakhua ngaia Jan Aushadhi Scheme hnuaia damdawi man tlawm pek chhuah a ni chu lawmawm a tih thu a sawi a. Swash Nari, Sashakt Parivar Campaign ruala hawn tak nu leh naupangte hriselna kawnga hmalakna leh chaw tha ei pawimawh zia inzirtirna 8th Rastriya Poshan Maah Campaign kalpui tur chuan rah tha a chhuah ngei a beisei thu a sawi bawk.
Larsap chuan India rama Infant Mortality Rate hniam ber (13 per 1000 live births) zinga Mizoram a tel chu lawmawm tiin, hei hian naupang leh nau piang hlimte enkawl kawnga Mizoram hmasawn zia a tarlan thu a sawi a. Kum tin Doctor 100 dawn leh Nurse engemaw zatin Mizoram health care system an zawm belh thu sawiin, hriselna kawnga Mizoram tha tichaktu pawimawh tak an ni, a ti a. HIV/AIDS, drug ngawlveina leh malaria-te chu ngaihven tul zual a la nih mek zel thu leh, vaihlo leh a kaihhnawih dangte kan tih nasat avanga cancer leh chuap natna vei Mizoramin a ngah chu veiawm a tih thu sawiin, hneh thei tur chuan khua leh tui zawng zawngte kan zavaia tanrual a tul a ni, a ti a. Khawtlang hrisel leh chak neih a nih theih nan hriselna kawnga Sawrkar kaipui scheme-te tha taka kalpui a tul thu sawiin, health & family welfare department hnuaia hmalakna chhuanawm takte chu tha taka chhunzawm zel a tul thu a sawi bawk.
Thusawitu dang Health & Family Welfare Minister Pi Lalrinpuii chuan ram chhung hmun dang ruala hmeichhiate hriselna tur campaign pawimawh tak Swasth Nari Sashakt Parivar leh Poshan Maah Mizorama kalpui tura hawn a ni chu lawmawm a tih thu sawiin, hmeichhiate’n theihna nasa tak an neih thu leh tawiawmna tha an dawn phawt chuan hlawhtlinna ropui tak an hmuh theih thu a sawi a. Hriselna lama thawktute chu rawngbawlna thinlung pu chunga hna thawk tura chahin, campaign kalpui hun chhunga a tam thei ang ber te’n hlawkna an hmuh theih nana theihtawp chhuah turin a fuih a. Hmalakna tur hrang hrangte tarlangin, a hlawhtlin theih nan VC/LC, NGO leh Kohhrante tanrualpuiah a sawm nghal bawk.Swasth Nari, Sashakt Parivar campaign-in a tum ber chu chhungkaw nu ber atanga tana hriselna bultan a ni a. Hemi hnuaiah hian September ni 17 atanga October ni 2, 2025 chhung hian hmeichhiate hriselna lam hawi campaign kalpui tur niin, Hospital hrang hrang, Health & Welness Centre leh Health Sub-Centre-ahte health camp leh check-up neih a ni dawn a. PMJAY, PMMVY leh Nikshay Mitra enrollment kalpui a ni dawn a, Ayushman Bharat Health Account (ABHA) ID siam a ni dawn bawk a. Naupang vaccine pek, BP sang, zunthlum, hnute cancer, anaemia leh TB vei zawn chhuah bakah AYUSH awareness, Oral health leh Blood donation camp-te buatsaih a ni dawn bawk a. 8th Rastriya Poshan Maah kaltlangin nu leh naupangte hriselna nan hmalakna hrang hrang kalpui a ni bawk ang.
